VOV4.K’ho –  Di ngai chờ dờng Phật đản – Phật lịch nam 2564, ala mat kuang đơng lam bồ Đảng, dà lơgar, Phó Thủ tướng, ồng Trương Hòa Bình neh tus còp, nting sap gờm chờ Gah jat yàng Phờk dà lơgar Việt Nam mờ ală cau jat yàng Phờk. Phó Thủ tướng đơs nền, Phật đản là broă gah jat yàng Phờk kuơmàng ngan tàm rài kis nùs nhơm mờ pin dờn bơh làng bol jat yàng Phờk tàm lơgar Việt Nam dê.

Phó Thủ tướng kơp kờ` gah jat yàng Phờk Việt Nam pơn jờng cau jat yàng Phờk lơh jat nền nòn ală jơnau sồr bơh Đảng, dà lơgar dê bè rơcang sơndră kòp Covid-19, geh broă lơh pơrjum pin dờn jat yàng dùl bă dipal mờ bơta geh ngan; tus bal tă pơgồp tàm bơtàu tơnguh lơh sa mpồl bơtìan nàng Việt Nam pơn jat tai là lơgar tiơng pơn rơ niam tàm broă rơcang sơndră kòp, kung bè là tiah pơn rơ niam bè bơtàu tơnguh lơh sa mpồl bơtìan.

Hòa thượng Thích Thanh Nhiễu, Phó Chủ tịch Thường trực Hội đồng duh broă gah jat yàng Phờk Việt Nam đơs nền, Gah jat yàng Phờk lơgar Việt Nam geh pơn jat tai đơng lam cau jat yàng phờk lơh jat nền nòn ală jơnau sồr bơh Đảng mờ dà lơgar dê, pơgồp bơnah chul chồl lơh sa bơtàu tơnguh, gàr tơl niam rài kis mpồl bơtìan.

Cau mblàng K’Duẩn