VOV4.K’ho- Bộ Giao thông Vận tải, gah rơndeh par mờ ală Bộ, gah broă lơh geh gơ rềng yal mờ ală kuang đơng lam bồ, lam lơh broă lơh rơcang pờ wơl ală gùng par kă bro dunia, geh broă rơndap lơh loh làng nàng cau Việt Nam tàm lơgar ndai in gơtùi cih mat lài blơi vĕ rê wơl hờ lơgar, bơsong gờñ mờ ƀuơn ngan rlau jơh jơnau kờñ rê wơl hờ lơgar dipal bơh làng bol dê. Do là jơnau sồr bơh Phó Thủ tướng ồng Vũ Đức Đam, Phó Kuang atbồ Mpồl đơng lam dà lơgar rơcang sơndră kòp Covid-19 tàm dơ̆ lơh broă mờ Bộ Y tế mờ 2, 3 bộ, gah broă lơh geh gơ rềng bè broă cau Việt Nam tàm lơgar ndai, cau lơgar ndai mut tàm lơgar Việt Nam geh lơh tàm mho ngai 08/12.

Bơh jơnau đơs bơh ală Bộ, gah broă lơh dê, Phó Thủ tướng Vũ Đức Đam đơs nền: bơdìh mờ jơnau kờñ rò cau jak chài, kỹ sư, cau lơh broă geh bơta chài uă cau lơgar ndai, nac nhơl chờ dunia drơng bơtàu tơnguh lơh sa- mpồl bơtiàn, ală Bộ, gah broă lơh pal sền gròi tus jơnau kờñ rê wơl hờ lơgar bơh cau Việt Nam lòt lơh broă, bơsram sră, lơh broă, còp cau tờm pròc mhàm gơtìp kòl wơl tàm lơgar ndai tài bơh kòp bơtờp, kung bè làng bol Việt Nam ơm kis tàm lơgar ndai bal mờ ală cau tờm geh dờp bơta dong kờl bè cau Việt Nam jat jơnau sồr.

Cau mblàng K’Duẩn