VOV4.K’ho- Đơng lam dơ̆ pơrjum Mpồl đơng lam dà lơgar rơcang sơndră kòp Covid-19 geh lơh drim ngai 10/5 tàm hìu lơh broă Chính phủ, Phó Thủ tướng ồng Vũ Đức Đam tơngkah ală càr, ƀòn dờng pal sền gròi uă tus broă rơcang sơndră kòp tàm ală anih lơh sa, kă bro, anih lơh sa mờ măi mok, hìu sơnơm, drà, tiah tờm kă bro, ngan là tŭ Bộ Y tế yal bơta bơtờp kòp mhar rlau tàm ală tiah ndơp, gal cau. Tŭ do geh 26 càr, ƀòn dờng tàm lơgar geh gam geh kòp Covid-19.

Kòp gam jŏ jòng, ờ hềt gơtùi git tŭ lơi jơh, Ủy ban Nhân dân ală càr, ƀòn dờng pal sơlơ lòt sền, sền sơ wì, chul chồl ală anih lơh sa tàm càr, ƀòn dờng nền nòn lơh jat jơnau sồr bơh Mpồl đơng lam dà lơgar dê bè broă pơlam rơcang sơndră mờ đơs jơnau pơhìn bơtờp kòp ai cau lơh broă tàm anih lơh broă mờ hìu ơm bal ai cau lơh broă in. Gơ wèt mờ ală anih geh jơnau pơhìn uă ndai bè hìu sơnơm, drà, tiah tờm kă bro pal lơh jat nền nòn ală jơnau sồr rơcang sơndră kòp neh geh Bộ Y tế pơlam.

Cau mblàng K’Duẩn