VOV4.K’ho- Mho ngai 14/9, tàm hìu lơh broă Chính phủ, Phó Thủ tướng ồng Vũ Đức Đam neh đơng lam dơ̆ pơrjum mờ ală bộ, gah broă lơh mờ cau jak chài gah lơh sơnơm bè broă kơlôi sơnơng, tàm jàu công nghệ, cĭt tơrlòng lài, lơh gơlik sơnơm, sơnơm vaccine rơcang sơndră kòp Covid-19. Tàm dơ̆ pơrjum, ala mat Bộ Y tế pà git, kờp dŭ ngai do (15/9) geh bal mờ Mpồl duh broă bơto pơlam pà sră cih mat dan lơh pơrjum nàng sền sơ wì ai gơnoar jal mhar gơ wèt tus mờ sơnơm vaccine Nanocovax.

Đơs tàm pơrjum, Phó Thủ tướng Vũ Đức Đam sồr Bộ Y tế đơng lam dơ̆ pơrjum mờ Hội đồng Đạo đức dà lơgar mờ Mpồl duh broă bơto pơlam pà sră cih mat dan lơh nàng ai tơlik ală jơnau đơs, jơnau sồr bè sơnơm vaccine kòp Covid-19. Phó Thủ tướng Vũ Đức Đam tơngkah Bộ Y tế mhar lơh sir broă rơndap lơh tơrlòng lài mờ bơsong jơnau bè gơnoar tờm sơnơm Molnupiravir sơm kòp Covid-19.

Cau mblàng K’Duẩn