VOV4.K’ho- Drim ngai 18/10, tàm Hà Nội, Phó Thủ tướng ồng Vũ Đức Đam, Phó Kuang atbồ Mpồl đơng lam dà lơgar rơcang sơndră kòp Covid-19 lơh broă mờ Bộ Khoa học mờ Công nghệ bè ai tơlik lài gùng dà mờ broă lơh khoa học công nghệ drơng sơndră kòp. Tàm pơrjum, ală kuang bàng sền sơ wì bơta dong kờl uă ngan bơh Khoa học công nghệ dê tàm broă lơh rơcang sơndră kòp Covid-19.

Tơngai tus, gah khoa học công nghệ pal pơn jat tai kơlôi sơnơng sơnơm vaccine mờ sơnơm sơm, ală broă lơh xét nghiệm pa; kơlôi sơnơng lơh gơlik kít đal git khà mờ bơta pràn bơrlŭ bal kháng thể lam lơh ală kơnòl broă kơlôi sơnơng, sền sơ wì gơ rềng tus lơh sa, mpồl bơtiàn mờ ală jơnau dan, lam lơh ală broă lơh bè bơto bơsram, lơh sơnơm, niam chài tàm tŭ tơngai pa. 2, 3 nă kuang bàng đơs là, pal geh broă rơndap lơh tŭ bơcri priă kơlôi sơnơng bơtàu tơnguh măi mok rơcang sơndră kòp mờ ngui tàm jàu măi mok; broă lơh gơ hòi gơ jà bơta pràn kơlôi sơnơng măi mok, broă lơh rơcang sơndră kòp.

Cau mblàng K’Duẩn