VOV4.K’ho - Ngai òr (27/09), Phó Thủ tướng ồng Vũ Đức Đam neh lơh broă mờ kuang đơng lam ƀòn dờng Hồ Chí Minh bè broă rơcang sơndră mờ kòp Covid-19, pơgồp bal jơnau đơs tàm rơndăp broă cih Chỉ thị tam gơl wơl ală broă lơh gơdờp bal, gròi sền kòp Covid-19 mờ brồ guh lơh sa bơh ngai 01 nhai 10.

                                                              Phó Thủ tướng ồng Vũ Đức Đam

Phó Thủ tướng đơs tờm, ƀòn dờng Hồ Chí Minh pal lơh jăt gùng dà broă tơnguh broă gròi sền kòp gơtờp, lơh tam gơl wơl pràn, rơhời brồ guh kơl jăp broă lơh sa kă bro, gờñ ai rài kis bơh làng bol rê wơl mờ bơta bè ờs pa. Ƀòn dờng pal gờñ sền wơl bơta kòp tàm tiah do, tàm hơ̆ uă ngan là tơnơ̆ mờ dơ̆ xét nghiệm tàm uă tiah pa do jăt jơnau đơng lam bơh Thủ tướng, bơh tŭ hơ̆, ai geh bơta pràn xét nghiệm, khà gơtờp tàm ală tiah di gơlan gơtìp. Phó Thủ tướng đơs là, tàm broă pờ wơl, ƀòn dờng pal kơlôi tus mờ broă ai lài broă lơh wơl bơh ală hìu măi, mpồl lơh sa kă bro dờng, tiah lơh sa công nghệ cao, ờ uă gah lơh broă drơng ala kuơ màng.

Cau mblàng Ndong Brawl