VOV4.K’ho- Drim ngai 04/8, Phó Thủ tướng ồng Vũ Đức Đam, Kuang atbồ Mpồl đơng lam dà lơgar rơcang sơndră kòp Covid-19 neh lòt sền tàm anih cit sơnơm vaccine quận Cầu Giấy, sền sơwì broă lam lơh ơm yah ngài tàm 2, 3 bộ, gah broă lơh mờ lòt sền broă lơh rơcang sơndră kòp Covid-19 tàm 2, 3 tiah wàng se, anih tam cah is tơrgùm bal tàm ƀòn dờng Hà Nội.

Phó Thủ tướng ồng Vũ Đức Đam đơs, ƀòn dờng Hà Nội lam lơh anih cit sơnơm vaccine gàr ală bơta bè rơcang sơndră kòp, anih cit ha pah, ơnàng, gàr niam broă ơm yah ngài mờ lam lơh yal bè tiah lòt rê tơl làm. Bè broă lam lơh ală broă lơh jòi cau ơm rềp, xét nghiệm, tam cah is nàng đal git tiah geh kòp, lơh kloh ală tiah geh kòp, Phó Thủ tướng sồr pal lam lơh sơbac mhar, bơsong jơh tơn, kờñ lơh gơlik ală tiah ờdo ờdă (gam hòi là tiah tơlir) kơ̆ kơljap, đal git mhar ală tiah geh kòp uă, hời rơ hời ai ală tiah geh jơnau pơhìn uă, uă ngan rê hờ khà lơyah rlau mờ gơ gơs tiah ờdo ờdă wơl. Phó Thủ tướng ồng Vũ Đức Đam đơs nền ală broă lơh sơndră kòp pal ơn cồng nha lơh geh lài ngan.

Cau mblàng K’Duẩn