VOV4.K’ho- Drim ngai 20/7, Phó Thủ tướng ồng Vũ Đức Đam lam bồ Mpồl kuang bàng dà lơgar lòt còp, lơh broă mờ sền sơwì broă lơh rơcang sơndră kòp Covid-19 tàm Bình Dương. Anih sơn rờp bơh Mpồl kuang bàng lòt sền là Kong ti TNHH Yazaki EDS Việt Nam tàm ƀòn dờng Dĩ An. Kong ti gam lơh jat rơndap broă 3 tơn tàm dùl anih, hơ̆ là sàu sa, bic mờ lơh broă tàm hìu măi ai mờr 400 nă công nhân in nàng gàr broă lơh sa mờ rơcang sơndră kòp Covid-19.

Bơh lòt sền broă lơh rơcang sơndră kòp bơtờp tàm mpồl lơh sa kă bro, Phó Thủ tướng sồr ală kong ti tàm càr Bình Dương tŭ lam lơh rơndap broă 3 tơn tàm dùl anih den pal yal jơh ală dữ liệu bè công nhân ai gơnoar atbồ tàm do in nàng ƀuơn mờ mhar tàm broă lùp sền dịch tễ dilah mpồl lơh sa kă bro geh ală cau bơtờp kòp, pin bơtờp kòp. Ƀùi mho, Phó Thủ tướng ồng Vũ Đức Đam bal mờ mpồl kuang bàng dà lơgar pơrjum mờ kuang đơng lam bồ càr Bình Dương bè broă lơh rơcang sơndră kòp bơtờp.

Cau mblàng K’Duẩn