VOV4.K’ho - Drim òr (05/08), Mpồl kuang bàng lơh broă bơh Chính phủ geh Phó Thủ tướng ồng Vũ Đức Đam lam bồ neh tus sền broă rơcang sơndră mờ kòp tàm càr Bình Phước. Mpồl kuang bàng lơh broă neh tus sền gròi broă sơm kòp cau kòp Covid-19 tàm hìu sơnơm ing kơnhoàl Đồng Phú, càr Bình Phước.

        Phó Thủ tướng ồng Vũ Đức Đam lòt sền broă rơcang sơndră mờ kòp Covid-19 tàm càr Bình Phước

Hìu sơnơm do geh 150 nơm jơnờng piam kòp, lơh broă bơh ngai 30 nhai 7 tus tŭ do mờ gam sơm 43 nă cau kòp. Lài mờ hơ̆, hìu sơnơm neh sơm bời ai 3 nă cau kòp mờ neh geh rê bơh hìu sơnơm. Phó Thủ tướng ồng Vũ Đức Đam dờp mờ đơs niam broă lơh ngan bơh mpồl y bác sĩ, điều dưỡng neh sơm kòp ai cau kòp Covid-19 in. Phó Thủ tướng đơs tờm, bơdìh mờ broă pơlam sơm kòp bơh Bộ Y tế dê, càr do pal kah tus mờ broă pơgồp bal Đông, tây y mờ ai geh bơta niam, nùs nhơm niam cau kòp in hơ̆ sồng geh mhar bời kòp. Tŭ do, càr Bình Dương mờ ƀòn dờng Hồ Chí Minh geh khà cau gơtìp kòp uă, den tàng càr Bình Phước bañ sền ờ sơ̆p, ờ sền gròi tàm broă rơcang sơndră mờ kòp gơtờp.

Cau mblàng Ndong Brawl