VOV4.K’ho- Drim ngai 26/3, tàm Học viện Quân y (Bộ Quốc phòng), Phó Thủ tướng, ồng Vũ Đức Đam, Kuang atbồ Mpồl đơng lam dà lơgar rơcang sơndră kòp Covid-19 lòt còp mờ pơn jờng mpồl tus bal kơlôi sơnơng mờ ală cau tus bal is cit tơrlòng ding dơ̆ 2, tơngai dơ̆ 2 sơnơm vaccine Nano Covax.

Jat Giáo sư, Tiến sĩ Đỗ Quyết, Kuang atbồ Học viện Quân y đơs, tus tŭ do, tơngai kơlôi sơnơng, lơh gơlik sơnơm vaccine Nano Covax neh tơrmù lơyah tus khà lơyah ngan rlau jơh gơtùi mơya kung gam gàr bơta khoa học ờdo ờdă nàng kờñ mhar geh sơnơm vaccine ờdo ờdă, geh cồng nha ai cau Việt Nam in. Dơ̆ cit tơrlòng sơnơm vaccine rơcang sơndră kòp Covid-19 Nano Covax tơngai dơ̆ 2 geh 560 nă cau cih mat cit tơrlòng, rề ơnàng cau cit bơh 18 tus rlau 60 sơnam, tàm hơ̆ 2, 3 nă cau mùl geh kòp tàm să ờ huan kơn jơ̆ ir. Tơngai dơ̆ 3 gơtùi cit tơrlòng tàm 10 rbô nă cau, bơh hơ̆, geh cơng tàng khoa học nàng tàm pơndrờm, nàng Việt Nam gơtùi lơh gơs jơnau kờñ mhar geh sơnơm vaccine, kờp dŭ tàm nhai 9 nam do.

Cau mblàng K’Duẩn