VOV4.K’ho - Drim òr (26/05), tàm hìu lơh broă Chính phủ, Phó Thủ tướng ồng Vũ Đức Đam, Kuang atbồ Mpồl đơng lam Dà lơgar bè sơndră mờ kòp Covid-19 geh dơ̆ pơrjum pờ tơlĭk tàm internet mờ kuang đơng lam ƀòn dờng Hồ Chí Minh bè bơta gơlĭk geh mờ broă sơndră mờ kòp Covid-19.

                       Phó Thủ tướng ồng Vũ Đức Đam pơrjum pờ tơlĭk tàm internet mờ ƀòn dờng Hồ Chí Minh

Kờp tus 10 jơ ngai òr (27/05), ƀòn dờng Hồ Chí Minh neh dờp tai geh ờ uă cau geh gŏ mờ kòp dơ̆ sơnrờp gơrềng mờ gah lam sồr jăt yàng Phục Hưng, tơnguh khà cau geh gŏ mờ kòp tus 25 nă. Tơnơ̆ mờ tŭ geh gŏ tiah gơtìp kòp pa, ală mpồl lơh broă neh bơyai lơh tam cah is, wàng se. Tŭ do, ală mpồl neh ai geh 70 nă cau F1 mờ 336 nă cau F2.

Tàm pơrjum, Phó Thủ tướng Chính phủ ồng Vũ Đức Đam neh sồr ƀòn dờng Hồ Chí Minh rơcang geh ală broă sơndră mờ kòp di pal, pal dong kờl ală tơngu me lơi den rơcang yal lài, Chính phủ, ală Bộ, gah lơh broă dà lơgar geh pơgồp bal, dong kờl. Đơs tờm, ƀòn dờng Hồ Chí Minh là tiah dờng bè broă kă bro, Bộ Giao thông Vận tải ring bal mờ gùng dà broă lơh tềng đăp măt ală dơ̆ par dong kờl làng bol rê hờ lơgar Việt Nam ờ hềt geh cèng rê hờ ƀòn dờng Hồ Chí Minh.

Cau mblàng Ndong Brawl