VOV4.K’ho- Tàm dơ̆ pơrjum pờ tơlĭk tàm internet mờ 2 càr Bắc Ninh mờ Bắc Giang mho òr (07/06), Phó Thủ tướng ồng Vũ Đức Đam, kuang atbồ mpồl đơng lam dà lơgar sồr càr Bắc Ninh pal rơcang ngăc lài mờ tiah kòp pa tàm Công ty AAC.

Tàm càr Bắc Ninh, geh 3 tiah gam gơtìp cau gơtờp kòp Covid-19, hơ̆ là kơnhoàl Thuận Thành, kơnhoàl Quế Võ mờ ƀòn dờng Bắc Ninh. Tềng đăp mờ broă kơnhoàl Thuận Thành kờp dŭ geh 58 ƀòn geh tam gơl bơh broă wàng se tus broă tam cah is mpồl bơtiàn, Phó Thủ tướng ồng Vũ Đức Đam sồr ală tiah bañ ờ sền gròi, sền ờ sơ̆p. Tus tŭ do, tàm càr Bắc Giang neh geh kơrian tiah gơtờp kòp tŭ 5 rơbô 800 phan xét nghiệm tàm mpồl bơtiàn kơnhoàl Việt Yên neh geh cồng nha ờ gŏ mờ kòp.

Phó Thủ tướng ồng Vũ Đức Đam đơs, broă atbồ nền nòn tàm tiah tam cah is tơrgùm bal, tiah wàng se mờ tam cah ngài mpồl bơtiàn là kuơ màng ngan, tiah lơi cấp ủy, gơnoar atbồ ƀòn lơgar lơh jăt niam kơrnoăt rơcang sơndră mờ kòp gơtờp, lơh broă geh kơnòl uă den tàm tiah hơ̆ geh ring niam ha là gờñ kơrian geh kòp gơtờp.

Cau mblàng Ndong Brawl