VOV4.K’ho- Cơldŭ lơh broă Chính phủ pa geh sră ngan yal jơnau đơs sồr lơh bơh ồng Vũ Đức Đam- Phó Thủ tướng Chính phủ, Kuang ătbồ Mpồl đơng lam Dà lơgar rơcăng sơndră kòp Covid-19 bè bàr pe bơta pal sền ngăc tàm tŭ lam lơh jăt jơnau sồr bè rơcăng sơndră kòp Covid-19.

Jăt mờ hơ̆, Bộ Y tế, ală gah, ală tiah mhar  kờp sền ală sră nggal sồr lơh, bơto pơlam broă lơh ờs mờng nàng tam gơl halà bơtơl di tŭ, di pal mờ bơta gơbàn bơh broă gơlik geh dê; Jăt tàm bơta gơbàn bơh kòp bơtờp dê mờ broă ai lơh pơnyơu tam dră wơl mờ kòp, bơto pơlam ală tiah lơh ală broă ai lơh pơnyơu; di tŭ yal, tam gơl halà bơtơl mat phan bơna, măy mok, dà sơnơm, sơnơm tơm ba kờñ pal geh drơng broă lơh rơcăng sơndră kòp in nàng ală tiah rơcăng lài blơi jăt jơnau đơs “4 tơn dùl bă tiah”; Sồr bơyai lơh sền swì nền vaccine di jơnau sồr, di tŭ; bơto pơlam, dong kờl lơh sră nggal ală mpồl cau, mpồl lơh sa kă bro blơi halà dờp vaccine dong kờl. Tơnguh tai broă lơh yal tơngĭt jơnau, mblàng yal pal loh làng song dơ pă lơh geh bơta ring bal, jơh nùs lơh ngan rơcăng sơndră kòp tàm jơh gùt mpồl bơtiàn.

Cau mblàng Lơ Mu K’Yến