VOV4.K’ho- Phó Thủ tướng Thường trực Chính phủ ồng Trương Hòa Bình lòt sền mờ lơh broă mờ gơnoar atbồ ală quận Gò Vấp mờ Bình Thạnh bơh ƀòn dờng Hồ Chí Minh dê bè broă lơh rơcang sơndră kòp tàm ală tiah do.

Tàm ală dơ̆ lơh broă mờ 2 quận Gò Vấp mờ Bình Thạnh, Phó Thủ tướng sồr ală quận pal geh broă rơndap lơh rơcang wil tơl phan bơna nàng gàr 4 tơn tàm dùl anih tŭ kòp gơlik geh kal ke. Sơlơ atbồ ù tiah, pơn jat tai tơnguh broă mblàng yal tus làng bol, ngan là gơ wèt mờ ală anih lơh sa, ală hìu ơm ơpah bơh công nhân dê, cau tac bro dềt lơh jat niam jơnau sồr 5K. Phó Thủ tướng Thường trực tơngkah ală tiah pal lơh niam broă lơh pơgồp bal tàm broă lam lơh jat, ngan là tŭ geh mpồl lơh broă geh ai tus nàng dong kờl rơcang sơndră kòp. Jat ồng, Bulah mpồl tus bal rơcang sơndră kòp bơh tiah ndai ai tus halà mpồl lơh broă tàm ù tiah do tơn den quận pal rơcang lài atbồ nền nòn, ring bal, gàr ờ lơh gơ rềng, lơh gơbàn kal ke làng bol in.

Cau mblàng K’Duẩn