VOV4.K’ho - Drim òr (22/12), Ủy viên Ƀộ Cíñ trị, Phó Thủ tướng Thường trựk Cíñ phủ ồng Phạm Bình Minh bal mờ mpồl kuang bàng lơh broă neh tus còp, pà phan mờ chờ gờm Kơnràñ lik lìng tàm Toà Tổng Giám mục Huế; còp mờ chờ gờm Kơnràñ lik lìng tàm hìu yàng cíñ toà Phủ Cam Huế.

Ala măt kuang đơng lam Đảng mờ Dà lơgar, Phó Thủ tướng ồng Phạm Bình Minh chờ gờm bơta pràn kơl dang să jan, pà phan mờ pà goàng bơkào chờ gờm Kơnràñ lik lìng Tổng Giám mục Nguyễn Chí Linh, Kuang atbồ gah jăt yàng bàp Huế, Củ tịc Mpồl duh broă gah jăt yàng bàp Việt Nam; chờ gờm ală cau kơ đơng yàng bàp mờ jơh làng bol jăt yàng tàm gah jăt yàng bàp Huế chờ gờm dùl kàl Noel niam bơnĕ mờ nam pa 2022 chờ hờp, gơboh gơbài. Mờ kơ̆p kờñ ală cau kơ đơng yàng bal mờ làng bol jăt yàng bàp pơn jăt tai tơnguh bơhiàn kờñ gơboh mờ dà lơgar, bal mờ dà lơgar, tơnguh ală cồng nha neh lơh geh, kơnòl làng bol, pơgồp bal uă rơlao tai tàm broă bơ̆t bơtàu dùl dà lơgar Việt Nam tài jơnau kờñ làng bol pas gơs, dà lơgar pràn kơl dang, làng bol lơh tờm, ndrờm bal, jăk chài.

Cau mblàng Ndong Brawl