VOV4.K’ho- Drim ngai 27/12, Ƀộ Giao thông vận tải pơgồp bal mờ Ủy ƀan Ñân zân càr Lai Châu bơyai lơh sơn đờm lam lơh rơndap broă tơrbŏ bal gùng lòt ală càr tiah kơh bơnơm đah tô dà lơgar. Rơndap broă geh priă bơcri rlau 5 rbô 300 tơmàn đong, dong tơrmù lơyah gùng lòt bơh tiah tờm ală càr Lai Châu, Lào Cai, Yên Bái mờ ală tiah ndai geh gơ rềng rê tus càr lơgar Hà Nội.

Đơs tàm dơ̆ bơyai lơh, Phó Thủ tướng Thường trựk ồng Phạm Bình Minh đơs nền bơta kuơ bơh rơndap broă dê tàm rơndap tap sèng phan bơna gùng lòt, chồl pràn bơtàu tơnguh lơh sa- mpồl bơtiàn ai ală càr geh rơndap broă in mờ ai jơh gùt tiah Tây Bắc in. Nàng rơndap broă gơtùi lam lơh di mờ tŭ tơngai hơ pơrgon, Phó Thủ tướng Thường trựk Cíñ phủ sồr kwang atbồ Ƀộ Giao thông- Vận tải, mpồl atbồ rơndap broă lơh sồ 2 pal gròi sền, jơh nùs tàm broă đơng lam, atbồ bơta niam, tơngai lam lơh, priă tă lơh tàm jơh gùt tơngai lam lơh rơndap broă, gàr bơta nền nòn, kràñ cê, di adat boh lam.

Cau mblàng K’Duẩn