VOV4.K’ho-Nam 2018, lơh sa gùt plai ù geh tềl tơngo\ gơ ơm wơl, kă bro gơguh lơyaì rlau mờ jơnau yal lài, tam dră kă bro đah Mỹ mờ Lo gơlik geh kal ke mờ digơlan pơn jat tai jo\ jòng. Tàm tu\ tơngai hơ\, lơh sa Việt Nam dê kung gam pơn jat tai lơh geh bàr pe cồng nha pal cih dờp ngan.

Gơguh lơh sa lơh geh rlau 7% là khà jơnhoa ngan rlau jơh tàm 10 nam rê hờ do kơnờm tàm bơta pràn tờm là gah lơh sa mờ măy mok lơh mòn phan mờ gah drơng broă ala. Uă cau mờng chài lơh sa đơs, nam 2019, lơh sa dà lơgar dê pơn jat tai gơguh digơlan lơh geh khà 7%.

Jơnau yal bơh Ủy ban Gròi sền priă jền Dà lơgar dê pà go\, nam pa do lơh sa gùt plai ù geh uă bơta gơ tam gơl, tàm hơ\, tam dră kă bro neh lơh tus khà kă bro gùt plai ù gơmù uă ngan tàm nam 2018 mìng gam 4,2% mờ nam 2019 digơlan mìng gơguh 4% lơm.

Tàm tu\ hơ\, lơh sa Việt Nam kung gam pơn jat tai lơh geh bàr pe cồng nha pal cih dờp ngan; gơguh lơh sa kung gam lơh geh rlau 7%, gơmù khà priă geh gròi sền hơđơm 3,6%, gơmù khà priă sền bal gàr kơ\ kơl jăp hơđơm 1,5%.

Ală tàm pơnring dờng bơh rài lơh sa dê geh lơh niam, tàm pơndrờm tơm priă jền dunia gơguh uă, dồs dà lơgar mờ tàm pơnring kes priă geh gròi sền lơh tơl ală jơnau kờ` bơh Quốc hội dê ai. Jat ồng Lê Xuân Nghĩa, cau mờng chài lơh sa, đơs, cồng nha gơguh bơh nam 2018 dê là bơnàng jă ai gơguh lơh sa tàm nam 2019 in.

Nam 2018, Việt Nam geh khà gơguh lơh sa uă sơl tàm pơgăp 10 nam do, digơlan khà gơguh do gam jo\ jòng tus nam 2019. Hơ\ là kơnờm tàm ală jơnau kuơmàng, hơ\ là gơguh ngui sa nam 2018 pràn ngan, gơguh tăc phan mờ lơgar ndai sơrlèt uă rlau pơndrờm mờ broă rơndăp lơh bol he neh ai.

Gơguh bơh tiah mpồl lơh sa kă bro tàm dơlam is uă rlau là mpồl lơh sa kă bro lơgar ndai bè tăc phan mờ lơgar ndai. Dùl bơta pràn ngan tai hơ\ là tăc phan lơh geh bơh sươn sre mờ lơgar ndai, phan tàm dà tăc mờ lơgar ndai lơh geh khà 40 tơmàn dolar Mỹ, do là khà gơguh uă ngan.

Tam gơl bè lơh sa, kuơmàng là lơh tam gơl bè tiah bơcri priă neh niam rlau. Broă Chính phủ krà` cê jơh nùs koh tơrmù ală sră ai gơnoar lơh geh uă bơta pràn ai bơtàu tơnguh in…Den tàng bè hơ\, ală cau mờng chài đơs là, do geh gơ gơs là bơta pràn lơh geh bơnàng jă gơguh ai GDP in tàm khà yal lài pơgăp 7% tàm nam 2019.

Jat ồng Hoàng Công Tuấn, Kuang atbồ gah kơlôi sơnơng lơh sa- Công ty chứng khoán MBS, đơs, sơnđờm bơh nam 2012 tus tu\ do, pơlam gùng đơng lam gùng dà broă lơh bơh Đảng, Dà lơgar dê là dipal ngan. Hơ\ là broă ờ sền dờng màng ir tàm gơguh lơh sa lơyah tơngai mờ tơrgùm tàm broă lơh niam wơltiah kă bro, rơndăp tăp sèng wơl rài lơh sa…

Bal mờ hơ\ là broă dong kờl lơh pràn bơtàu tơnguh lơh sa is, tam gơl pa broă gơguh. Ồng Hoàng Công Tuấn đơs bè do.

Tàm nam 2019, bol a` pơn jat tai pin dờn ngan mờ ală pơlam gùng, broă đơng lam dipal ngan mờ di ngan bơh Đảng, Dà lơgar dê. Bơh hơ\, bol he gơtùi sền go\, rài lơh sa dà lơgar dê kơ\ kơl jăp gơguh tàm khà jơnhoa ngan.

Bol a` kơ\p kơnờm tàm bơta gơguh pràn bơh tiah lơh sa is dê geh bơtàu tơnguh niam tàm nam 2019 mờ nam 2020 kung bè ală nam pơn jat tai nàng pơn jat tai lơh ai rài lơh sa Việt Nam in geh cồng nha lrau mờ gơguh niam rlau tai mờ kơ\ kơl jăp rlau.

Uă cau mờng chài lơh sa đơs là, pal lơh tam gơl pa kơrnoat boh lam mờ tiah kă bro pràn kơldang rlau nàng kờ` gơguh tai bơcri priă bơh làng bol dê. Bal mờ hơ\ là broă rơndăp tăp sèng wơl lơh sa pal lơh niam, tam gơl uă mờ loh làng rlau broă lơh gơguh nàng kờ` ngui geh ală tu\ tơngai niam tus bơh jơnau dunia.

 Hơ\ là gùng dà tam gơl lơh sa tài bơh gơrềng bơh tam dră kă bro; kơ\p kơnờm niam ngan bơh ală Hịêp định kă bro rài pa bè CPTPP, EVFTA mờ bàr pe ală FTAs ndai…Gơmù khà priă gơtùi gròi sền ơm tàm khà pơgăp 4% dilah broă tam gơl khà priă drơng broă ala dà lơgar geh gròi sền niam.

Ồng Trương Văn Phước, ala mat Kuang atbồ Ủy ban Gròi sền priă jền dà lơgar đơs là, gah broă lơh sa mờ măy mok lơh mòn phan mờ drơng broă ala geh gơmù dùl êt tàm nam pa do mơya kung gam là bơta pràn tờm bơh rài lơh sa dê. Bal mờ hơ\, ală tam gơl bè gùng dà broă lơh kung kờ` pal geh bơta lơyaì nàng gơmu\t jrô mờ gơcèng wơl ală cồng nha geh kuơ ngan. Ồng Trương Văn Phước, đơs ngan.

Nam 2019, bol a` yal lài gơguh GDP bơh Việt Nam dê geh gơ ơm tàm khà 7% tus bơh broă mblàng sền mờ yal lài bè broă lơh sa dunia mờ tàm lơgar. Lơh sa dunia bal mờ broă kơlôi rơcang ngòt tam dră kă bro kung gam gơlik geh den kung gam geh sơl bơta [ươn mờ bơta kal ke.

Tam gơl drà kă bro tàm lơgar kung geh yal lài geh uă bơta dong kờl ai gơguh GDP in tàm nam 2019 hơ\ là: gùng dà broă lơh lơh pràn lơh sa is làng bol dê, tam gơl pa broă lơh gơguh, tiah kă bro pơn jat tai lơh niam wơl…Hơ\ là ală jơnau tờm ngan mờ bol a` geh jơnau yal lài gơguh lơh sa Việt Nam tàm nam 2019 geh ơm tàm khà 7%, gàr gơmù khà priă hơđơm 4%.

Bulah pin dờn tàm gơguh tàm nam 2019 pơgăp 7% mơya ală cau mờng chài kung đơs là, rài lơh sa Việt Nam dê geh tìp kal ke tàm jơh ală bơta lòng dờng bơh rài lơh sa dunia dê gam pal kong. Bè dơ\ tam dră kă bro đah Mỹ mờ Lo geh gơrềng tus broă kă bro dờng dềt, bơh hơ\ lơh gơlik kal ke tus broă tăc phan mờ lơgar ndai bơh Việt Nam dê.

Nàng lơh geh wơl bơta pràn bơh rài lơh sa dê gơ sồr bơta đơng lam ngac ngar jak chài bơh Chính phủ dê tàm broă rơndăp gùng dà broă lơh lơh sa dờng nàng gơdờp mờ bơta geh ngan bơh gùt plai ù tu\ do dê.

Cau mblàng Lơ Mu K’Yến