VOV4.K’ho - Tềng đăp mờ kal ke bơh kòp Covid-19, mho òr (31/05), UBND càr Lâm Đồng neh geh sră nggal jal mhar bè broă pơn jăt tai lơh jăt pràn ngan ală broă sơndră, tam dră mờ kòp.

Càr Lâm Đồng gam tơnguh broă sền gròi kòp gơtờp tàm ală anih sền gròi lĭk mờ mŭt tàm càr

UBND càr Lâm Đồng sồr ală sở, gah lơh broă tàm càr, ală mpồl lơh broă chính trị mpồl bơtiàn, UBND ală kơnhoàl, ƀòn dờng tàm càr lơh jăt nền nòn mơ ală broă sơndră, tam dră mờ kòp Covid-19. Tàm hơ̆, sồr jơh ală cau rê bơh tiah gơtìp kòp ndrờm pal ngui ală broă tam cah is tơrgùm bal 21 ngai, bơh tŭ 5 jơ mho òr (31/05).

Ală cau tus tàm càr Lâm Đồng pal yal mờ cau lơh sơnơm in

Ală cau ờ lơh jăt nền nòn geh gơtìp lơh glài nền nòn di jăt mờ adăt boh lam. Mìng is ală cau rê bơh tiah neh gơtìp wàng se, tam cah ngài mpồl bơtiàn tàm ƀòn dờng Hồ Chí Minh mờ ală càr Bắc Giang, Bắc Ninh... bơh ngai 18 nhai 05 tus tŭ do, pal lơh jăt broă yal gah lơh sơnơm, sền gròi bơta pràn kơl dang să jan tàm hìu mờ hơ ờ geh lĭk bơdìh hìu tus 14 ngai.

Bal mờ hơ̆, UBND càr Lâm Đồng sồr ơm ing jơh ală broă pơn diang năc bơh ƀòn dờng Hồ Chí Minh rê tus càr Lâm Đồng. Ală broă ñô sa jun bao, jun kòn, tòm ngai deh kung ơm ing jơh; chơ̆t jê ờ geh tơrgùm gal ir 30 nă cau tàm dùl tŭ mờ lơh jăt nền nòn jơnau sồr 5K. Tàm tơngai do, càr Lâm Đồng ờ ai ală kuang bàng, công chức, viên chức bal mờ cau lơh broă lĭk bơdìh càr.

Cau mblàng Ndong Brawl