VOV4.K’ho - Drim òr (10/12), tàm Hìu sơnơm Quân y 175, Ƀan Tuyên giáo Dà lơgar, Ƀăo Điện tử Đảng Kộng sản Việt Nam pơgồp bal lơh pơrjum khoa học “30 nam pơgồp bal ling klàng bal mờ làng bol lơh sơnơm tàm dà lềng, bồt dà lềng”, nàng sền wơl ală bơta kuơ, cồng nha bơh broă lơh do tàm 30 nam do, ai geh jơnau bơsram broă mờng chài nàng tơnguh broă lơh do tàm tơngai tus.

Bơh 30 nam, broă lơh do neh lơh niam broă drơng, sền gàr bơta pràn kơl dang să jan làng bol mờ cau ling tàm dà lềng, bồt dà lềng; tơnguh broă lơh sơnơm tàm 972 xã, tàm hơ̆ geh 597 xã gơwèt tiah ngài, tiah nhàr dà lơgar, tiah bồt dà lềng. Kuơ màng là bơ̆t bơtàu geh cồng nha 5 broă lơh pơgồp bal lơh broă bơh hìu sơnơm kơnhoàl mờ mpồl lơh sơnơm ling klàng gơwèt Mpồl đơng lam ling klàng kơnhoàl. Rơlao 40 jơnau đơs tàm pơrjum neh lơh loh bơta kuơ ciñ trị bơh broă pơgồp bal ling klàng mờ làng bol lơh sơnơm tàm dà lềng, bồt dà lềng; ai gŏ do là gùng dà broă lơh di pal ngan bơh Đảng, Dà lơgar, ờ mìng pơgồp bal tàm broă sền gàr mờ tơnguh uă bơta pràn kơl dang să jan ai làng bol, cau ling in mờ gam geh kuơ uă ngan mờ broă lam sồr, tơnguh broă lơh geh bơta pràn sền gàr dà lơgar bơh gùt làng bol, bơta pràn sền gàr bơta lơngăp lơngai làng bol nàng sền gàr tơl, niam ù tiah dà lơgar dê.

Cau mblàng Ndong Brawl