VOV4.K’ho - Kờp tus tŭ do, neh geh 388 anih pơgồp bal ai phan geh lơh bơh broă lơh sa suơn sre mờ phan sa là ală hìu lơh, hợp tác xã lơh sa, kă bro dan cih măt. Hơ̆ là jơnau đơs bơh Mpồl lơh broă kuơ màng bơh Bộ Nông nghiệp mờ Phát triển Nông thôn tàm tiah hờ đah jum dà lơgar. Mùl màl: 85 anih pơgồp bal bè biăp, kơnuh, plai chi; 102 anih pơgồp bal bè plai chi; 157 anih pơgồp bal bè phan tàm dà; phan sa là 24 anih; gam tai là ală bơta phan ndai. Kờp dŭ bơh tŭ do tus lồi nam, khà biăp tàm ală càr đah jum dà lơgar geh di pơgăp 5 tơlăk 700 rơbô tấn, tơl nàng ai broă ngui sa in.

Mìng is 19 càr, ƀòn dờng gam gơtìp tam cah ngài tơl nhai ai geh drà kă bro bơh 560 rơbô tus 600 rơbô tấn biăp. Thứ trưởng Bộ Nông nghiệp mờ Phát triển Nông thôn ồng Phùng Đức Tiến pà git, bơsong khà phan geh lơh bơh broă lơh sa suơn sre tơl phan sa, phan ngui, broă tơnhào phan geh lơh bơh broă lơh sa suơn sre tàm 19 càr, ƀòn dờng tiah hờ đah jum dà lơgar gam geh tam cah ngài mpồl bơtiàn là dùl tàm ală broă lơh mhar pal mhar geh bơsong, Bộ kung neh geh jơnau hòi jà Bộ Quốc phòng sền wơl, hòi jà ling klàng dong kờl làng bol mờ ală càr, ƀòn dờng gam gơtìp kal ke.

Cau mblàng Ndong Brawl