VOV4.K’ho- Ờ geh broă lơh, ờ geh priă jền, pal tam gơl broă lơh là ală bơta lơi mờ pơgru mầm non lơh broă tàm hìu bơsram làng bol dê lơh is tàm càr Dăk Lăk gam pal kong tơnơ̆ tŭ tơngai jŏ jòng kòp Covid-19 lơh bơtờp. Broă sền gàr, gàr wơl pơgru lơh broă tŭ ờ lơh geh priă jền kung là jơnau kal ke ngan bơh ală hìu bơsram mầm non làng bol dê lơh is tàm càr do.

Mờr 10 năm lơh broă sền gàr kơnòm dềt, pơgru Trần Thị Hải lơh broă tàm Hìu bơsram Mầm non Tư thục Tuổi thơ tàm sơnah ƀòn Tấn Tiến, ƀòn dờng Ƀuôn Ma Thuột, càr Dăk Lăk ờ gŏ tŭ lơi kơlôi tus geh tŭ pal ơm lơh broă ờ sa priă nhai tàm sùm tŭ tơngai jŏ jòng. Ờ gŏ di bè pơgru lơh broă tàm ală hìu bơsram dà lơgar dê crơng gơs, ală pơgru bơto tàm hìu bơsram làng bol dê lơh is bè pơgru ờ geh dờp bơta dong kờl lơi bơh đah hìu bơsram. Ơm rlô bơto ndrờm bal mờ broă ờ geh priă jền. Nàng gàr rài kis, pơgru Hải jòi broă lơh tăc phan online mờ gơn kơnờm geh gờñ geh tus wơl mờ broă sền gàr kơnòm dềt. Ùr pơgru Trần Thị Hải, yal: Bơh tŭ ală sau ơm rlô bơsram nàng rơcăng sơndră kòp tus tŭ do den pơgru bol oh kung ơm rlô sơl. Bè ờs den jơh ală priă tă dơ̆ ngui kơnờm jơh tàm priă nhai lơm, bàr pe nhai den gam jòi geh đau, mơya jŏ jòng den kung kal ke ngan sơl. Tŭ do geh broă lơi den lơh broă hơ̆, ơm kơ̆p tai dùl tŭ tơngai tai sền geh tus wơl bơto tàm hìu bơsram halà ờ.

Pơgru Hìu bơsram Mầm non Tây Nguyên, ƀòn dờng Ƀuôn Ma Thuột, càr Dăk Lăk jùt ràu hìu bơsram, cơldŭ bơsram, phan nhơl kơnòm dềt dê tàm tơngai ơm rlô kòp

Ờ mìng pơgru kal ke mờ ală hìu bơsram, mpồl ơdŭ làng bol dê lơh is kung kal ke ngan sơl tŭ hìu bơsram pal ơm lơh broă tàm jŏ jòng sùm uă nhai do. Ùr pơgru Đồng Thị Thuận, Kuang ătbồ Hìu bơsram Mầm non Tây Nguyên tàm sơnah ƀòn Thành Nhất, ƀòn dờng Ƀuôn Ma Thuột pà gĭt, hìu bơsram gam pal jê bồ ngan tàm pơnring tă mờ dơ̆ ngui nàng sơrlèt gan đau tŭ tơngai kal ke do. Hìu bơsram geh rlau 40 nă kuang bàng, pơgru mờ cau lơh broă. Ală sau ơm rlô bơsram, hìu bơsram ờ geh priă jền mơya kung gam pal tơm ală bơnah priă gàr broă lơh. Pah nhai cau tờm hìu bơsram pal tă tơm ală bơnah priă, bè: priă càn tờm, priă cồng ngân hàng dê, tơm priă ƀảo hiểm xã hội, ƀảo hiểm y tế, ƀảo hiểm ờ geh broă lơh ai pơgru, cau lơh broă in jăt jơnau sồr bơh kơrnoăt boh lam dê. Ùr pơgru Đồng Thị Thuận kơlôi rơcăng ngan mờ đơs: Nđờ nhai do hìu bơsram ờ geh priă nàng tơm priă nhai ai pơgru in den tàng ală pơgru kal ke ngan. Kơ̆p kờñ là ală kấp geh bơta dong kờl is ai gah bơto bơtê in. Kuơmàng là ală ùr pơgru mầm non geh bơta dong kờl is nàng pơndờm pơnđiang ală pơgru in ơm wơl mờ hìu bơsram ơm wơl mờ ơdŭ tŭ kơnòm bơsram lòt bơsram wơl. Bơta tai là ală bơnah priă dong kờl kung lơh mhar rlau nàng cau lơh broă in geh dờp gờñ rlau tàm tŭ tìp kal ke tài bơh kòp dờng do.

Jơh gùt càr Dăk Lăk tŭ do geh 70 hìu bơsram mầm non làng bol dê lơh is mờ rlau 80 mpồl kơnòm dềt tư thục, làng bol crơng gơs. Bơta krơi is kấp bơsram mầm non sền gàr là tờm den tàng kal ke ngan gơtùi bơyai lơh bơto bơtê pờ tơn tàm internet. Hìu bơsram til mpồng rơcăng sơndră kòp Covid-19, pơgru mầm non làng bol dê lơh is “ờ geh broă lơh”, ndrờm bè ờ geh khăt dùl bơnah priă lơh geh lơi. Bè broă dong kờl cau do, ồng Phạm Đăng Khoa- Kuang ătbồ Sở Giáo dục mờ Đào tạo càr Dăk Lăk pà gĭt: Bè ală kal ke gơwèt mờ bơto bơtê làng bol dê lơh is, kuơmàng là bơto bơtê mầm non den Ủy ƀan Nhân dân càr kung sồr ai Sở Giáo dục mờ Đào tạo càr in tơrgùm kờp pơgru lơh broă tàm ală hìu bơsram làng bol dê lơh is gơwèt mờ kấp bơsram mầm non nàng tă pơgồp jơnau đơs mờ Ủy ƀan Nhân dân càr yal mờ Chính phủ nàng geh dờp bơta dong kờl jăt kơrnoăt 68 bơh Chính phủ dê mờ đơs ngan là ờ geh bơta dong kờl bơh Chính phủ dê den ală hìu bơsram làng bol dê lơh is, ngan là bơto bơtê mầm non ờ gơtùi kong jai kong geh mờ dùl tŭ tơngai jòng ngan mờ ală hìu bơsram pal til mpồng.

Uă pơgru mầm non tàm hìu bơsram làng bol dê lơh is lòt jòi priă jền bơh broă tăc phan online tàm tơngai ală hìu bơsram ơm rlô rơcăng sơndră kòp

Ală hìu bơsram mầm non tư thục geh gơnoar broă kuơmàng, tam pà bơta kơn jơ̆ mờ ală hìu bơsram mầm non dà lơgar dê crơng gơs, kuơmàng là tàm ală ƀòn lơgar geh gal làng bol ơm kis, mơkung pơgồp bơnah uă ngan tàm srơh mpồl bơtiàn lơh bal bơto bơtê tàm Dăk Lăk. Mơya, tàm bơta kòp Covid-19 gơbàn kal ke tŭ do, ală hìu bơsram mầm non làng bol dê lơh is bal mờ mpồl cau pơgru gam kal ke ngan mờ jơnau “piang sàu àu soh” nàng gàr rài kis mờ broă lơh bơh hìu bơsram dê. Den tàng bè hơ̆, ală broă dong kờl ai hìu bơsram mầm non làng bol dê lơh is bè phan bơna; ờ tă halà tơrmù dia; càn priă dong kờl priă cồng kờñ pal geh sền gròi rlau tai.

Cau cih Vũ Hương Lý- Cau mblàng Lơ Mu K’Yến