VOV4.K’ho - Rơlao 20 nam tus bơto tàm hìu bơsram cấp 2 Nguyễn Trường Tộ, tàm xã Ea H’ Đing, kơnhoàl Cư̆ Mgar, càr Dăk Lăk, pơgru Lương Hữu Hải bŭ lah kis is dùl nă să tàm hìu ơm ơpah, mơya neh dong kờl git nđờ rơhiang nă kơnòm bơsram geh rài kis gơtìp rơƀah ờ pal gơtìp ơm ờ lòt bơsram nggùl gơl. Ờ mìng bơto sră, pơgru gam dong kờl ală kơnòm bơsram kis ngài mờ hìu ơm ơpah ờ sa priă, lam sồr tă geh ào mpha, sră cih, rơndeh coh pà ală kơnòm bơsram geh rài kis rơƀah in; dờp dong kờl ală kơnòm bơsram geh rài kis kal ke, dong kờl ală kơnòm bơsram lòt bơsram nàng ròng geh bơta kơ̆p kờñ tơnơ̆ do.

Bơh uă nam do, ròt hìu ơm ơpah hờ lồi gùng dềt tàm ƀòn Ea Sang, xã Ea H’ Đing, kơnhoàl Cư̆ Mgar, càr Dăk Lăk neh gơs hìu ơm bal bơh ală kơnòm bơsram rơƀah kòn cau dê.

                         Pơgru Lương Hữu Hải bơto sồr ală kơnòm bơsram, bơsram jơnau bơsram

Ròt hìu ơm ơpah geh pơgru Lương Hữu Hải, bơto dà Mỹ, drơng broă đội hìu bơsram cấp 2 Nguyễn Trường Tộ ơpah ờ mìng là anih ơm gời ờ sa priă ai 30 nă kơnòm bơsram geh rài kis rơƀah in, mờ gam là anih nàng pơgru bơto dà Mỹ ờ sa priă ai di pơgăp 150 nă kơnòm bơsram geh rài kis kal ke in. Bal mờ hơ̆, pơgru gam dờp dong kờl, ròng siam bơsram sră ai uă kơnòm bơsram geh rài kis kal ke in. Lài dùl tàm ală kơnòm bơsram geh pơgru Hải dờp dong kờl, oh H’ Ba Su Đi Mlô đơs: “Hìu nhă oh kal ke ngan, mè bèp lòt lơh broă ngài. Bàr nă oh mờ mi oh ơm mờ mò ồng. Bơh tŭ geh pơgru Hải dong kờl piang sào, ào soh den oh ưn ngài ngan. Oh geh lơh ngan bơsram sră nàng bơsal wơl mờ broă neh dong kờl bơh pơgru dê”.

Pơgru Lương Hữu Hải neh bơto tàm hìu bơsram cấp 2 Nguyễn Trường Tộ, tàm xã Ea H’ Đing, kơnhoàl Cư̆ Mgar, càr Dăk Lăk rơlao 20 nam do. Do là hìu bơsram tàm tiah làng bol kòn cau, rài kis bơh làng bol gam uă ngan kal ke. Đơs bè ală broă lơh bơh să tờm dê, pơgru Lương Hữu Hải yal: “Să tờm añ neh kis tàm ù tiah Tây Nguyên do bơh dềt, bơh nam bơsram ơdŭ 3, ơdŭ 4. Lài do kung kal ke ngan kờñ bơsram sră, geh pơgru, cau bơyô dong kờl den añ rê wơl tàm do, añ gŏ pal geh lơh dùl broă lơi hơ̆ nàng ưn ngài cau pơgru. Mờ tàm tiah làng bol kòn cau, ală kơnòm bơsram kal ke ngan, mùl màl broă ơm ờ lòt bơsram bơh ală kơnòm bơsram geh uă ngan den tàng añ git pal geh kơnòl mờ ală kơnòm bơsram do”.

                      Git nờ rơbô pang sră măi pơgru Hải yòng nàng pà ală kơnòm bơsram gơtìp kal ke in

Ồng Bùi Đình Thảo, Kuang atbồ hìu bơsram cấp 2 Nguyễn Trường Tộ pà git, tàm tiah làng bol kòn cau, tiah ngài do, tơl nă cau pơgru ờ mìng bơto sră mờ gam geh kơnòl lam sồr, dong kờl kơnòm bơsram bañ sơbì bơsram nggùl gơl. Uă nam do, pơgru Lương Hữu Hải sùm là cau pơgru lam lài tàm broă lơh jăt kơnòl do. “Pơgru Lương Hữu Hải tàm ală nam do neh geh ală broă lơh mùl màl ngan, tàm hơ̆ uă ngan là broă lam sồr, dong kờl phan bơna ai ală kơnòm bơsram in, tàm hơ̆ uă ngan là kơnờm bơsram rơƀah sơrlèt mờ kal ke tàm xã Ea H’ Đing đơs bal mờ hìu bơsram cấp 2 Nguyễn Trường Tộ đơs is. Pơgru neh sơrlèt mờ ală kal ke is, tài pơgru tŭ do kung gơtìp kal ke ngan sơl, pơgru kis is dùl nă, hìu đam ờ geh. Pơgru rơwah geh dùl mpồl dềt nàng dong kờl ală kơnòm bơsram, tàm hơ̆ uă ngan là dong kờl ală kơnòm bơsram geh rài kis rơƀah ờ geh hìu ơm. Trồ mang, pơgru bơto ờ sa priă ai ờ uă kơnòm bơsram rơƀah gùt dar hìu ơm ơpah in. Bol añ kung ai lài bơnah broă lơi bè tơngai bè phan lơh broă, dong kờl bè broă dan mờ gơnoar atbồ gơwèt mờ broă lơh bơh pơgru dê”.

Ồng Nguyễn Hữu Nhất, Chủ tịch UBND xã Ea H’ Đing pà git, pah nam pơgru Lương Hữu Hải neh dong kờl, lam sồr di pơgăp 30 nă kơnòm bơsram geh rài kis kal ke sơbì bơsram ơm tàm hìu bơsram. Bơh bồ nam bơsram tus tŭ do, pơgru Hải neh lam sồr geh git nđờ rơbô pang sră măi, ào mpha pa, rơndeh coh... kờp jơh khà geh mờr 200 tơlăk đong nàng dong kờl kơnòm bơsram geh rài kis kal ke là kòn cau in. Tàm dơ̆ kòp gơtìp pa do, pơgru Hải gam lam sồr geh 65 rơbô nơm chèo, rơlao 460 lít dà rào kloh vi khuẩn mờ 21 nơm măi was duh să jan nàng dong kờl ƀòn lơgar rơcang sơndră mờ kòp gơtờp. “Mờ ală broă lơh pơgồp bal mờ ală mpồl lơh broă kờñ gơboh tàm càr mờ càr ndai, pơgru neh tơrgùm sền wơl ală kơnòm bơsram kòn cau kis bơh yau tàm do gơtìp kal ke bè sră măi, sră cih, bal mờ ală bơta phan ndai. Pơgru neh pơgồp bal mờ lơh jăt ală dơ̆ lơh broă nùs nhơm dong kờl mờ dong kờl uă ngan kơnòm bơsram tàm xã. Tàm broă rơcang sơndră mờ kòp Covid-19 tàm xã, tàm tơngai pa do, pơgru kung neh pơgồp bal mờ cau geh nùs nhơm niam hòi jà, dong kờl pà ală phan cau cau rơƀah, cau gơtìp kal ke, cau gơtìp tam cah ngài, tiah wàng se, kơrian in. Hòi jà ai geh ală hìu bơsram in ală măi lơh kloh vi khuẩn, măi was bơta duh să jan is, chèo lơh sơnơm”.

Mờ nùs nhơm kờñ gơboh, pơgru Lương Hữu Hải neh sơbì jơnau kơ̆p kờñ is bơh să tờm, pơn jăt tai dong kờl git nđờ rơhiang nă kơnòm bơsram gơtìp kal ke in kờñ geh lòt bơsram, gơs cau geh kuơ mpồl bơtiàn dê.

Cau cih Tuấn Anh- Cau mblàng Ndong Brawl