VOV4.K’ho- Ngai 22/10, Tổng lãnh sự quán Việt Nam tàm Khon Kaen pơgồp bal mờ gơnoar atbồ mờ Mpồl cau lơgar Thái Lan jơi Việt Nam tàm càr Nakhon Phanom yŭ rơyùm bơyai lơh tơngkah 45 nam ngai crơng gơs git gơp lơh broă bal Việt Nam- Thái Lan tàm Ƀòn git gơp lơh bơyô Thái Lan- Việt Nam tàm ƀòn Mạy, tiah mờ Chủ tịch Hồ Chí Minh ơm rlô tàm nhai 7 nam 1928.

Đơs tàm dơ̆ tơngkah, Tổng lãnh sự Việt Nam tàm Khon Kaen ồng Chu Đức Dũng đơs nền, 45 nam do, Việt Nam mờ Thái Lan neh lơh ngan bal mờ gơp ai git gơp đah 2 lơgar bơtàu tơnguh pràn kơldang, bơt bơtàu git gơp lơh broă bal, lơh bơyô, pin dờn, sền dờng màng bal mờ gơp, ring bal, geh kuơ bal. Thái Lan tŭ do neh gơ gơs là lơgar lơh broă bal kuơmàng khà dùl bơh Việt Nam dê tàm mpồl ASEAN.

Jat Tổng lãnh sự ồng Chu Đức Dũng đơs, tàm dơ̆ cribơyai tàm điện thoại đah 2 Thủ tướng Chính phủ Việt Nam mờ Thái Lan tàm nhai 5 pa do, 2 nă kuang đơng lam bồ ring bal tàm tơngai kòp Covid-19 tŭ do, 2 lơgar pal sơlơ lơh broă bal jơh nùs, ngan ngồn, geh cồng nha, uă broă geh lơh ngan ngồn, cèng wơl rài kis hờm ram, gơboh gơbài ai làng bol 2 lơgar in, lơh ngan tơnguh priă lơh geh bơh kă bro đah 2 lơgar geh 25 tơmàn dolar Mỹ tàm nam 2025.

Di tŭ do, dùl dơ̆ ràng tơlik rùp bè rài kis lơh broă Chủ tịch Hồ Chí Minh mờ 45 nam git gơp lơh broă bal Việt Nam- Thái Lan bal mờ dùl drà yal tơnggit phan lơh gơs Việt Nam- Thái Lan kung neh geh lơh, gơ hòi gơ jà bơta gròi sền bơh ală kuang bàng mờ cau lơgar he kis tàm lơgar Thái Lan.

Cau mblàng K’Duẩn