VOV4.K’ho - Ngai òr (27/09), tàm hìu Quốc hội neh bơyai lơh dơ̆ pơrjum cri bơyai lùp cau jak chài bè lơh sa mpồl bơtiàn. Tus bal dơ̆ pơrjum cri bơyai geh mờr 80 nă kuang bàng ala măt ală Bộ, gah lơh broă dà lơgar, mpồl lơh broă dunia, cau jăk chài gah lơh sa.

Dơ̆ pơrjum geh bơyai lơh mờ broă lơh pờ tơlik tàm internet mờ pơrjum tơn. Đơs tàm dơ̆ đơng lam pơrjum, Phó Chủ tịch Quốc hội ồng Nguyễn Đức Hải đơs tờm, ală jơnau đơs pơgồp bal tàm dơ̆ pơrjum ngai do là jơnau tơngit kuơ màng nàng Quốc hội ai tơlik kơrnoăt ală broă lơh kuơ màng dà lơgar dê bè broă lơh sa mpồl bơtiàn; Pơrjum kung là anih nàng ală cau jăk chài, ală cau khoa học, ală cau atbồ tơlik nùs nhơm jrô ơnàng, krơi is, kơl jăp. Ală cau jăk chài, ală cau khoa học, ală bộ, gah lơh broă dà lơgar pơgồp jơnau đơs bè broă tàm lơgar, tàm bơta geh nàng lơh gơs rơndăp broă tơnguh bơtàu lơh sa mpồl bơtiàn 4 nhai lồi nam 2021, gùt nam 2021 mờ bơ̆t bơtàu rơndăp broă nam 2022.

Cau mblàng Ndong Brawl