VOV4.K’ho- Kung tàm dùl ròt broă lơh lơh jat Ngai Hìu bơnhă Việt Nam, drim ngai 28/6, Mpồl tam klăc cau ùr dà lơgar Việt Nam pơgồp bal mờ Viện Kơlôi sơnơng Hìu bơnhă mờ cau ùr, cau klau, Viện Hàn Lâm Khoa học xã hội Việt Nam bơyai lơh pơrjum cribơyai Khoa học dà lơgar “Ai Nghị quyết Pơrjum dờng dơ̆ 13 bơh Đảng dê mut tàm rài kis: Bơt bơtàu bơta kuơ Hìu bơnhă Việt Nam- sền gĭt mờ gùng dà broă lơh”.

Tàm dơ̆ pơrjum cribơyai, ala mat ală Bộ, gah sơnah lơh broă, ală Kuang bàng jak chài tàm gah hìu bơnhă mờ cau ùr, cau klau cribơyai ală cồng nha kơlôi sơnơng khoa học mờ bơta mờng chài geh ngan bè ală bơta kuơ hìu bơnhă Việt Nam dê; kơlôi sơnơng sơnñio geh ală bơta kuơ hìu bơnhă tờm ngan, di pal mờ jơnau kơ̆p kờñ, bơta kơ̆p kơnờm bơh cau ùr dê kung bè di pal mờ gơnoar broă, kơnòl broă bơh Mpồl tam klăc cau ùr Việt Nam dê. Mơkung geh jơnau đơs, jơnau tơngkah ală srơh, ală dơ̆ hòi jà bè hìu bơnhă mờ ală broă lơh ngan ngồn di pal nàng lam lơh tàm tơngai tus. Pơrjum cribơyai geh bơyai lơh jat broă lơh tìp mat tơm bơh bơr tơn tàm anih pờ tơlik  tơn tàm internet bơh Hà Nội mờ pờ tàm internet tàm gùt lơgar bơh tàm SureMeet.

Cau mblàng K’Hạnh