VOV4.K’ho- Tàm pơrjum cribơyai dơ̆ 3, 100% Kuang bàng geh mat ring bal, dùl nùs bal cih mat 205 nă cau tàm anih lơh broă, mpồl cau, mpồl lơh broă tàm dà lơgar tơl bơta tơlik mat tĕ khà Kuang bàng Quốc hội khoá 15. Pơrjum bơh Ủy ban Mặt trận dà lơgar Việt Nam bơyai lơh drim ngai 15/04, tàm Hà Nội.

Tơnơ̆ dơ̆ tơn jơh pơrjum cribơyai dơ̆ 2, jat khà kờp bơh Mpồl duh broă tĕ khà dà lơgar dê, kờp jơh cau geh cih mat bơh sơnrờp jơh bal tàm dà lơgar mờ ală tiah dê là 1 rơbô 093 nă. Tàm hơ̆, Dà lơgar geh 205 nă ală tiah là 888 nă mờ geh 75 nă cau tơlik mat tĕ khà is. Den tàng bè hơ̆, khà 2,19 nă cau tơlik mat tĕ khà geh 1 nă Kuang bàng Quốc hội geh pồ. Tàm dơ̆ pơrjum, ală Kuang bàng jat tàm bơta tơl khà Kuang bàng Quốc hội, cồng nha ai jơnau đơs bơh cau tĕ khà tiah ơm kis gơwèt mờ cau tơlik mat tĕ khà nàng mbàng yal, iăt, kơno uă jơnau đơs geh ngan. Ală Kuang bàng sồr lơh loh broă yal tơngĭt Kuang bàng tơlik mat tĕ khà Kuang bàng Quốc hội lơh kơnòl broă sùm khoá 15.

Đơs tàm dơ̆ pơrjum, ồng Đỗ Văn Chiến Bí thư Đảng Dà lơgar, Chủ tịch Ủy ban Mặt trận dà lơgar Việt Nam đơs nền: pơrjum cribơyai dơ̆ 3 là broă lơh kuơ màng ngan bơh broă lơh tĕ khà dê, do là pơrjum ndŭt ndơl, nàng cih mat ală cau tơl bơta pơyoa Mpồl duh broă tĕ khà dà lơgar in nàng lơh jat ală broă lơh pơn jat tai.

Cau mblàng K’Hạnh