VOV4.K’ho - Pơn jăt tai broă pơrjum Đại hội đồng AIPA dơ̆ 42, ngai òr (24/08), geh bơyai lơh dơ̆ pơrjum Ủy ban chính trị, Ủy ban lơh sa mờ Ủy ban mpồl bơtiàn. Dơ̆ pơrjum Ủy ban Chính trị cri bơyai 03 tơngu me: tơnguh bơta lơngăp lơngai internet mờ sền gàr dữ liệu wèt tus dùl bơta niam internet pràn tàm mpồl ASEAN; Bè broă chồl pràn sền gàr bơta lơngăp lơngai kòn bơnus tàm gah kỹ thuật sồ tơrgùm bal ai mpồl ASEAN in mờ tơnguh broă lơh bal mờ lơgar ndai Nghị viện wèt tus mpồl bơtiàn ASEAN. Mpồl kuang bàng ala măt Quốc hội lơgar Indonesia bơtơl tơngu me jal mhar bè broă dong kờl bơh nghị viện bè bơta tàm lơgar Myanmar.

Dơ̆ pơrjum Ủy ban lơh sa: cri bơyai 02 tơngu me. Hơ̆ là bè: tơnguh broă tơrgùm bal broă lơh sa mpồl ASEAN bơh broă chồl pràn sồ jơh ală mpồl lơh sa kă bro dềt ngan, dềt mờ di mơ mờ Brồ guh broă lơh sa tơnơ̆ mờ kòp Covid-19: Lơh broă bal nhơl chờ tàm mpồl ASEAN. Tàm pơrjum do, mpồl kuang bàng lơgar Việt Nam kờp dŭ geh ai broă brồ guh mờ tơnguh bơtàu nhơl chờ di jăt ală kơrnoăt tơnguh bơtàu kơl jăp mờ tơl ală bơta. Kơlôi sơnơng mờ tơnguh bơtàu phan nhơl chờ pa di pal mờ broă kờñ pa tơnơ̆ mờ kòp Covid-19.

Pơrjum bơh Ủy ban mpồl bơtiàn tơrgùm cri bơyai 03 tơngu me. Hơ̆ là bè tơnguh broă lơh bal mờ chồl pràn broă kỹ thuật sồ tơrgùm bal nàng tơmù ờ uă ngan bơta gơrềng bơh tam gơl trồ tiah; ai ală tơngu me tơnguh bơtàu kơl jăp gùt plai ù nàng lơh geh cồng nha tàm cấp dà lơgar; Gơnoar bơh công nghệ ai geh bơta ƀuơn làng bol in tus bal tĕ khà uă rơlao.

Cau mblàng Ndong Brawl