VOV4.K’ho- Tàm Hà Nội gam geh lơh pơrjum dơ̆ 1, Quốc hội khóa 15. Pơrjum dơ̆ do geh gơtha dờng màng ngan, ai tơlik bơnàng jă ai broă lơh bơh Quốc hội khóa 15 dê in geh bơyai lơh pồ, ring bal pồ tơl kuang bàng ală gơnoar broă đơng lam bồ bơh ală anih lơh broă dà lơgar mờ lơh nền ală broă rơndap lơh lơh sa, mpồl bơtiàn, priă jền, kes priă, bơcri priă dà lơgar, broă lơh jơnau kờñ dà lơgar, lơh gơlik tơngume bal ai broă lam lơh jat tàm jơh gùt 5 nam tus in.

Broă lơh bơyai broă, kuang bàng dờng màng bơh dà lơgar dê là tơngume tờm bơh pơrjum dơ̆ 1 dê tàm tơngai lơh broă Quốc hội khóa 15. Jat jơnau cih bơh sơnua boh lam nam 2013 dê, tơnơ̆ tŭ geh Quốc hội pồ, Chủ tịch Quốc hội, Chủ tịch lơgar, Thủ tướng Chính phủ, Kuang atbồ Anih cah rơña jơnhua ngan rlau jơh dà lơgar geh lơh dơ̆ yal bơr guh at gơnoar broă tềng đap Quốc hội. Kờp jơh geh 50 gơnoar broă đơng lam bồ bơh ală anih lơh broă dà lơgar dê geh Quốc hội bơyai lơh pồ, ring bal pồ tơl tàm dơ̆ pơrjum do. Mìng is Chính phủ, tàm dơ̆ pơrjum do, pồ tơl 4 Phó Thủ tướng. Kuang atbồ Mpồl lơh broă kuang bàng Quốc hội mò Nguyễn Thị Phương Thanh pà git, ală gơnoar broă neh geh yal mờ Ban Chấp hành Đảng dà lơgar mờ Bộ Chính trị neh ring bal ală rơndap broă geh gơ rềng tus gơnoar broă bơh Quốc hội dê mờ rơndap broă rơndap tap sèng Chính phủ: “Mpồl kuang bàng duh broă, rơndap tap sèng bơh Chính phủ dê geh pồ tơl 27 gơnoar broă, geh: Thủ tướng, 4 Phó Thủ tướng mờ 18 Bộ trưởng, 4 nă kuang atbồ anih lơh broă ndrờm mờ Bộ. Rơndap broă neh geh sền sơ wì nền nòn jat broă sền sơ wì tơn jơh tơngai lơh broă bơh Chính phủ dê tơngai bơh nam 2016 tus nam 2021 mờ bơh broă sền sơ wì jơh ală bơta bè broă lơh kuang bàng”.

Broă pồ tơl Mpồl kuang bàng duh broă dà lơgar là ờ gơtùi lơyài. Bơta do sồr kơnòl broă uă bơh tơl nă kuang bàng dê tàm tơl tơngume dơ̆ pơrjum, kuang bàng là tàm broă pồ, ring bal, pồ tơl 50 gơnoar broă đơng lam bồ bơh ală anih lơh broă dà lơgar dê. Ồng Phạm Văn Hòa, Mpồl kuang bàng càr Đồng Tháp pà git: “Kơnòl bơh tơl nă kuang bàng dê pal tơrgùm, jơh nùs nàng ai tơnggŏ bơta pin dờn bơh làng bol dê tàm pơrjum. Lài ngan pal pồ geh 50 nă kuang bàng dờng màng. Chủ tịch Quốc hội, ală Phò Chủ tịch, ală kuang geh jơng; Chủ tịch lơgar, Phó Chủ tịch lơgar; Chính phủ, Phó Thủ tướng; ală kuang geh jơng tàm Chính phủ; Việm Kiểm sát; Anih cah rơña, Tổng Kiểm tơán... Jat añ do là kơnòl broă kuơmàng ngan”.

Mut pơrjum dơ̆ 1, Quốc hội khóa 15

Bal mờ broă lơh kuang bàng, Quốc hội geh lơh nền ală broă bè lơh sa- mpồl bơtiàn, priă jền, kes priă dà lơgar 6 nhai do mờ gùng dà, broă lơh ai 6 nhai lồi nam in, kuơmàng là Broă lơh jơh gùt tơngai lơh broă khóa 15. Hơ̆ là broă lơh bè bơtàu tơnguh lơh sa- mpồl bơtiàn, bè bơcri priă dà lơgar, bè priă jền, kes priă, kuơmàng là dồs dà lơgar mờ ală broă gơ rềng tus gah priă jền tơngai bơh nam 2021 tus nam 2025. Do là ală broă kuơmàng, lơh bơnàng jă ai broă lam lơh jat jơnau kờñ dơ̆ lĕ bal, ờ mìng sơndră kòp bơtờp mờ gam bơtàu tơnguh lơh sa mpồl bơtiàn, gơ wèt gơnoar bơh Quốc hội dê jat jơnau cih adat boh lam. Kuang gơnoar cih, Kuang atbồ Cơldŭ lơh broă Quốc hội ồng Bùi Văn Cường đơs nền: “Dilah Quốc hội ờ lơh nền broă lơh 5 nam bè lơh sa mpồl bơtiàn den digơlan kal ke ai Chính phủ in tàm broă lam lơh đơng pơlam ngan ngồn. Do là thể chế Nghị quyết pơrjum dờng dơ̆ 13 bơh Đảng dê. Quốc hội là anih lơh broă gơnoar dà lơgar jơnhua ngan rlau jơh, pal gơtùi ring bal ală gùng dà bè bơtàu tơnguh lơh sa- mpồl bơtiàn. Dilah Quốc hội lơyài ring bal den bè bơcri priă dà lơgar digơlan kal ke ngan, sơlơ lơyài den sơlơ lơh broă chồl pràn bơtàu tơnguh lơyài rlau”.

Bulah gam kong gơ rềng bơh kòp Covid-19 dê mờ broă gơlik geh kal ke, ờ gơtùi git lài, mơya tàm broă rơndap lơh bơtàu tơnguh lơh sa mpồl bơtiàn, Chính phủ kung gam pơn jat tai lơh ngan lam lơh jơnau kờñ dơ̆ lĕ bal nàngr ài lơh sa gơguh wơl. Chính phủ ring bal yal Quốc hội in ờ hềt tam gơl jơnau kờñ bơtàu tơnguh lơh sa mpồl bơtiàn nam 2021 neh ai tơlik là GDP gơguh bơh 6 tus 6,5%. Phó Chủ nhiệm Ủy ban Kinh tế bơh Quốc hội dê ồng Nguyễn Minh Sơn mblàng lơh loh: “Ờ tam gơl jơnau kờñ bè gơguh lơh sa. Jơnau là tài bơh kung gam lơh jat Nghị quyết sồ 124 bơh Quốc hội dê nàng lam lơh dùl ròt ală kơnòl broă, broă lơh mờ Quốc hội khóa 14 neh jàu Chính phủ in. Tàm tŭ hơ̆, Quốc hội sền sơ wì jơh ală bơta mờ kờp dŭ lài ală bơta gơ rềng bơh kòp Covid-19 dê tus rài lơh sa mờ kung ai tơlik nàng lơh ngan uă ngan rlau jơh tàm tơngai tus nàng lơh geh jơnau kờñ, cồng nha ai tơlik”.

Chủ tịch Quốc hội ồng Vương Đình Huệ đơs mut pơrjum

Nàng gàr cồng nha pơrjum dơ̆ 1, ală anih lơh broă bơh Quốc hội, Chính phủ, ală anih lơh broă sền gàr adat boh lam neh pơgồp bal lơh geh bơta ring bal uă mờ ală tơngume bơh Quốc hội dê. Tàm tŭ tơngai kòp Covid-19 gơlik geh kal ke, Quốc hội neh yal Bộ Chính trị in mờ pơrjum tơrgùm bal tàm cơldŭ pơrjum Diên Hồng mờ nùs nhơm tềm pềr tŭ tơngai uă ngan rlau jơh mờ geh cồng nha ngan rlau jơh, ờdo ờdă ngan rlau jơh. Dơ̆ pơrjum neh tơrmù 5 ngai pơndrờm mờ kờp dŭ lài, lơh broă jơh bal tàm ngai rlô. Ală kuang bàng Quốc hội tus bơh 19 càr, ƀòn dờng geh kòp neh geh rò. jun is, ơm hìu nac is mờ nggui pơrjum is dùl anih tàm cơldŭ pơrjum Diên Hồng. Kuang gơnoar cih, Kuang atbồ Cơldŭ lơh broă Quốc hội ồng Bùi Văn Cường pà git tai: “Bè kơrnuat pal jat, cau bơh tàm ală càr, ƀòn dờng gam lơh jat ơm yah ngài mpồl bơtiàn jat Jơnau sồr sồ 16 tŭ tus Hà Nội, dilah là cau bè ờs den pal tam cah is, mơya Thủ tướng Chính phủ neh lơh nền, gơ wèt mờ ală kuang bàng Quốc hội neh xét nghiệm 3 dơ̆ ờ bơtờp kòp, neh cit sơnơm vaccine den geh rê tus pơrjum bè ờs. Mơya kung gam pal lơh jat nền nòn ală jơnau sồr bè rơcang sơndră kòp Covid-19. Tŭ do bol he geh rơndap broă rơcang lài, dilah git gŏ kuang bàng lơi geh tềl tơnggŏ kòp den geh cơldŭ pơrjum is nàng tam cah is, mơya kung gam tus bal ală tơngume dơ̆ pơrjum mờ đùh sră pồ bè ờs”.

Cau tĕ khà gùt lơgar gam gròi sền mờ pin dờn là, pơrjum dơ̆ 1, Quốc hội khóa 15 geh lơh ờdo ờdă, geh cồng nha. Do là pơrjum kuơmàng ngan, dilah bơyai lơh niam mờ geh cồng nha den geh pơgồp bơnah chồl pràn bơtàu tơnguh lơh sa- mpồl bơtiàn dà lơgar, ngan là lam lơh jat jơnau kờñ dơ̆ lĕ bal, ờ mìng bơtàu tơnguh lơh sa mờ gam sơndră kòp Covid-19 geh cồng nha.

Cau mblàng K’Duẩn