VOV4.K’ho- Drim ngai 27/12, tàm Hà Nội, Ủy ƀan Mặt trận dà lơgar Việt Nam bơyai lơh Pơrjum pờ tơlik tơn tàm internet dơ̆ 11 Đoàn Củ tịc Ủy ƀan Mặt trận dà lơgar Việt Nam khoă IX. Đơs tàm dơ̆ pơrjum, Củ tịc Ủy ƀan Mặt trận dà lơgar Việt Nam ồng Đỗ Văn Chiến đơs nền, broă lơh bơh mặt trận dà lơgar Việt Nam dê tàm nam 2021 geh uă bơta ƀươn mơya kung pal kong mờ uă bơta kal ke, bơta lòng, ngan là bơta gơrềng jrô ơnàng làm uă, lơh gơrềng tus uă bơta bơh kòp dờng Kovid-19 dê. Ală cồng nha lơh geh bơh ală anih lơh broă mặt trận dà lơgar Việt Nam ală kâp dê là pal sền dờng màng ngan.

Bè kơnòl broă tờm nam 2022, Củ tịc Ủy ƀan Mặt trận dà lơgar Việt Nam ồng Đỗ Văn Chiến đơs sùm, Ƀan duh broă sùm neh sồr lơh gơ gơs broă rơndăp lơh loh làng, tơrgùm tàm 3 broă tờm. Dùl là tơnguh uă bơta geh ngan, cồng nha lơh broă jăt sền jơnau đơs tă pơgồp wơl bơh mpồl bơtiàn dê. Bàr là lơh uă gùng dà lơh broă nàng iăt kơno, bơtòm tơrgùm, tơrgùm kờp jơh ală jơnau đơs jơnau dan bơh cau tĕ khà mờ làng bol dê nàng yal wơl di tŭ mờ Đảng mờ Dà lơgar. Dơ̆ pe là tơnguh tai broă lơh pơrjum cribơyai tă pơgồp jơnau đơs pơgồp bal mờ lơh broă lơh gơlik geh tai bơta pràn bơh ală anih lơh broă mặt trận dà lơgar bơh Dà lơgar tus ƀòn lơgar.

Cau mblàng Lơ Mu K’Yến