VOV4.K’ho- Mho ngai (10/9), Ủy viên Bộ Chính trị, Phó Thủ tướng Thường trực Chính phủ ồng Phạm Bình Minh bal mờ Ủy viên Quốc vụ, Bộ trưởng Bộ Ngoại giao lơgar Lo ồng Vương Nghị đơng lam bal pơrjum dơ̆ 13 Ủy ban đơng lam lơh broă bal 2 gah Việt Nam mờ Lo.

Pơrjum dơ̆ 13 Ủy ban đơng lam lơh broă bal đah 2 gah Việt Nam mờ Lo

Tàm dơ̆ pơrjum, 2 gah ring bal sơlơ tơnguh bơyai lơh ală dơ̆ lòt còp, tìp mat kuang bàng kấp dờng màng; lam lơh geh cồng nha lơh broă bal đah 2 Đảng; lơh jat niam gơnoar broă kuơ màng bơh 2 Bộ Ngoại giao dê tàm broă tam pà bal, sơlơ tơnguh bơta gĭt gơ̆p 2 lơgar; lam lơh niam ală broă lơh tìp mat lơh kuèng, lơh broă bal tàm ală gah sền gàr dà lơgar, sền gàr bơta lơngap lơngai, lơh jat adat boh lam; cribơyai bơta mờng chài mờ lơh broă bal bè rcang sơndră kòp Covid-19, tàm hơ̆ geh lơh broă bal bè vaccine. Ồng Vương Nghị yal lơgar Lo geh dong kờl tai 3 tơlak ding vaccine ai Việt Nam in tàm nam do, tơnguh khà vaccine dong kờl bơh lơgar Lo dê gơguh tus 5 tơlak 700 rơbô ding. Bè broă tàm dà lềng, 2 gah ring bal pơn jat tai lơh jat niam bơta gĭt wă bal kuang bàng kấp dờng màng, gròi sền niam bơta ờ ring bal, ƀañ geh broă lơh lơh kal ke ală bơta, rề ơnàng broă tam pìt tam phà, bal mờ gơ̆p gàr niam bơta ring lơngai, kơ̆ kơljap tàm dà lềng tiah đah mat tơngai lik.

Cau mblàng K’Hạnh