VOV4.K’ho- Ngai 19/8, Hội đồng Nhân dân càr Dăk Nông khoá IV, tơngai lơh broă bơh nam 2021- 2026 sơnđờm mŭt pơrjum dơ̆ 2. Jăt jơnau yal tàm dơ̆ pơrjum, 6 nhai bồ nam 2021, jơh gùt càr geh 7 mpồl broă jàu bơtàu tơnguh lơh sa- mpồl bơtiàn lơh geh niam.

Khà gơguh lơh sa bal bơh càr dê kờp dŭ geh 6,03%. Kờp jơh tă dia dà lơgar geh 1 rbô 582 tơmàn đong, gơguh 29% pơndrờm bal dùl tŭ mờ nam 2020 mờ geh 58% kờp dŭ lài bơh càr dê jàu. Mơya tài bơh kòp Covid-19 lơh bơtờp kal ke neh lơh gơrềng uă ngan tus bơtàu tơnguh lơh sa- mpồl bơtiàn bơh càr dê.

Tàm dơ̆ pơrjum do, ală kuang bàng geh sền swì, lơh nền uă tơngume kuơmàng. Chủ tịch Hội đồng Nhân dân càr Dăk Nông pà gĭt, dơ̆ pơrjum dơ̆ do geh bơnah broă uă ngan. Den tàng bè hơ̆, ală kấp ală gah pal tơrgùm ngan jơh nùs jơh tồr, sơlơ pơđơl pràn uă rlau tai, bal mờ nùs nhơm kràñ cê jơh nùs, broă bơsong, broă lơh bơceh pa, geh cồng nha mờ dipal mờ bơta kòp Covid-19 gơbàn kal ke ờ gơtùi gĭt lài, nàng lơh jăt geh cồng nha broă rơndăp lơh bơtàu tơnguh lơh sa- mpồl bơtiàn bơh càr dê.

Cau mblàng Lơ Mu K’Yến