VOV4.K’ho - Drim do (20/10), pơrjum dơ̆ 2 Quốc hội khoă 15 mùl màl sơn đờm. Pơrjum bơyai lơh jăt broă lơh pờ tơlik tàm internet pơgồp bal mờ pơrjum tơrgùm bal tàm Hìu Quốc hội mờ tam pà gơs 2 dơ̆: dơ̆ 1 pơrjum pờ tơlik tàm internet bơh ngai 20 tus ngai 30 nhai 10, dơ̆ 2 pơrjum tơrgùm bal bơh ngai 8 tus ngai 13 nhai 11.

Bè hơ̆, Quốc hội geh lơh broă tàm 17 ngai, tàm hơ̆, rơcang lài bal gùng dà broă pơrjum pờ tơlik tàm internet jơh pơrjum tơn di lah kòp Covid-19 gơtìp kal ke. Jăt broă lơh, Chính phủ rơcang rơlao 50 jơnau yal, jơnau cih yal, rơndăp broă, broă lơh yal mờ Quốc hội. Tàm pơrjum do, Quốc hội kung sền wơl uă jơnau yal kuơ màng, bè sền wơl cồng nha lơh jăt rơndăp broă tơnguh bơtàu lơh sa mpồl bơtiàn mờ rơndăp kes priă dà lơgar nam 2021, broă rơcang sơndră mờ kòp Covid-19; ai tơlik kơrnoăt tơnguh bơtàu lơh sa mpồl bơtiàn nam 2022, kờp dŭ kes priă dà lơgar mờ gùng dà tam pà kes priă kes priă dà lơgar nam 2022 (tàm hơ̆ geh broă tơn rŭc tơngai lơh niam wơl broă lơh priă nhai). Ală jơnau yal bơh Kuang atbồ anih cah rơña dờng ngan rơlao jơh dà lơgar, Kuang atbồ Anih sền gròi ai ngui kơrnoăt boh lam dờng ngan rơlao jơh dà lơgar; ală jơnau yal bè: broă rơcang sơndră mờ sa kuề sa koà, broă rơcang sơndră mờ cau tìs mờ tìs mờ adăt boh lam, broă lơh jăt kơrnoăt lơh glài bơh anih cah rơña dê nam 2021; tơrgùm jơnau đơs, jơnau dan mờ cồng nha sền gròi broă bơsong... kung geh yal mờ Quốc hội. Kuơ màng, Quốc hội geh sền wơl, ai tơlik kơrnoăt ngui ù dà lơgar tơngai bơh nam 2021 tus 2030, wèt tus nam 2045 mờ rơndăp broă ngui ù 5 nam bơh nam 2021 tus 2025; rơndăp broă lơh niam wơl lơh sa tơngai bơh nam 2021 tus 2025.

Quốc hội kờp dŭ lơh broă pơn jăt sùm jơh ngai dơ̆ poh mờ ngai rơlô, mờ gùng dà broă lơh tềm pềr nàng geh tơngai, tŭ lơi kung rơcang lơh bơdìh jơ, lơh tai tàm tŭ trồ mang nàng tơmù tơngai pơrjum mơya kung gam gàr bơta niam. Do kung là jơnau kơ̆p kờñ di pal bơh cau tĕ khà gùt lơgar dê tàm bơta lơh jăt jơnau kờñ dơ̆ lĕ bal, rơcang sơndră mờ kòp mờ tơrgùm brồ guh wơl mờ tơnguh bơtàu broă lơh sa.

Cau mblàng Ndong Brawl