VOV4.K’ho- Ngai do (05/8), tàm hìu lơh broă Đảng dà lơgar, Mpồl đơng lam dà lơgar bè rơcang sơndră sa kuề sa kuà pơrjum dơ̆ 20 tềng đap bơta đơng lam bơh Tổng Bí thư ồng Nguyễn Phú Trọng dê, Kuang atbồ Mpồl đơng lam. Do là pơrjum sơn rờp bơh Mpồl đơng lam dà lơgar bè rơcang sơndră sa kuề sa kuà dê tơngai lơh broă Pơrjum dờng dơ̆ 13 bơh Đảng dê, geh lơh tàm tŭ tơngai kòp Covid-19 pơn jat tai gơlik geh kal ke, bơtờp uă tàm uă tiah tàm gùt lơgar.

Tàm dơ̆ pơrjum do, Mpồl đơng lam dà lơgar bè rơcang sơndră sa kuề sa kuà geh cribơyai, ai jơnau đơs gơwèt tus mờ Jơnau rơcang cih jơnau yal bè tơngai lam lơh, cồng nha lam lơh Broă lơh bơh Mpồl đơng lam dê 6 nhai do, lam lơh kơnòl broă ală nhai lồi nam do; Yal cồng nha đơng lam, bơsong ală broă gơlik geh, broă lơh tìs gơwèt Mpồl đơng lam gròi sền, đơng lam; Jơnau rơcang cih rơndap broă “Tam gơl, bơ tơl kơnòl broă, gơnoar broă bơh Mpồl đơng lam dà lơgar bè rơcang sơndră sa kuề sa kuà dê”; Jơnau rơcang cih jơnau sồr bè broă lơh gròi sền, sền sơwì broă lơh rơcang sơndră sa kuề sa kuà bơh Mpồl đơng lam dê.

Cau mblàng K’Duẩn