VOV4.K’ho- Drim ngai 08/10, Hìu bơsram Đại học Kinh tế - Đại học dà lơgar Hà Nội pơgồp bal mờ Hìu bơsram Đại học Hải Phòng, Hìu bơsram Đại học Thương mại mờ Mpồl atbồ Tiah lơh sa Hải Phòng bơyai lơh pơrjum khoa học mờ tơngume “FDI gùt plai ù mờ bơta rcang lài bơh mpồl lơh sa kă bro FDI tàm Việt Nam tàm tơngai pa”.

Jat jơnau yal tàm pơrjum, khà priă FDI gùt plai ù đơs bal mờ FDI tàm Việt Nam đơs is neh mờ gam kong bơta gơrềng pràn ngan bơh kòp dờng Covid-19 dê. Mơya, priă bơcri tơn bơh lơgar ndai tàm lơgar he tàm 9 nhai nam do kung gam lơh geh 22 tơmàn dolar Mỹ, gơguh 4,4% pơndrờm dùl tŭ bal mờ nam lài. Do là dùl cồng nha niam ngan, tơngŏ bơta pin dờn bơh ală cau bơcri priă, sac rơwah Việt Nam là anih tus bal gơ kờñ ngan nàng lơh sa, kă bro. Bulah bè hơ̆, ală kuang bàng kung mblàng ală bơta ờ hềt niam tàm broă gơ hòi gơ jà FDI bơh lơgar he dê tàm tơngai pa do, bè: bơta bơ̆ bơl tiah ơm kis, bơta aniai roh bơta sền gàr lơngap lơngai năng lượng, sền gàr lơngap lơngai priă jền bơh bàr pe rơndap broă lơh FDI dê. Bè gùng dà gơ hòi gơ jà FDI rơnàng pa tàm tơngai tus, ală kuang bàng đơs là, lơgar he kờñ pal geh ală broă lơh dong kờl uă, cèng bal bơta tàm pơrlòng, nàng gơ hòi gơ jà ală cau bơcri priă jŏ jòng.

Cau mblàng K’Hạnh