VOV4.K’ho- Drim ngai 09/12, tàm Hìu pơrjum Diên Hồng, Hìu Quốc hội dê bơh bơta đơng lam bơh Tổng Ƀí thư ồng Nguyễn Phú Trọng dê, Ƀộ Cinh trị, Ƀan Ƀí thư bơyai lơh pơrjum kuang bàng gùt lơgar mblàng yal mờ lam lơh jăt Jơnau đơs pơndŭt mờ Jơnau sồr bơh Dà lơgar dê bè bơ̆t bơtàu mờ lơh niam wơl Đảng.

Jơnau kờñ bơh pơrjum dê là pơn jăt tai lơh pràn broă bơyai lơh kơlôi sơnơng mờ lam lơh jăt Jơnau đơs pơndŭt 21 “Bè lơh pràn bơ̆t bơtàu, lơh niam wơl Đảng mờ ală anih lơh broă cing trị, kràñ cê kơ̆ dơn kơryan, tơrmù mờ lơh glài kràñ kuang bàng, đảng viên gơplơ̆ gơhŭc ờ niam bè bồ tơngoh cing trị, nùs nhơm rài kis, tơngŏ lơh gơlik geh is, tam gơl is” mờ Jơnau sồr 37 bè “Ală bơta Đảng viên ờ gŏ geh lơh” bơh Ƀan Câp hành Đảng Dà lơgar dê tàm jơh gùt Đảng mờ ală anih lơh broă cing trị bơh Dà lơgar tus ƀòn lơgar. Tàm pơrjum, Tổng Ƀí thư ồng Nguyễn Phú Trọng đơs sùm, bal mờ nùs nhơm là lơh pràn tam dră, jơh nùs lơh ngan tơn jơh nùs nhơm kơlôi is ai să tờm in; ờ mìng tam dră sa kuề sa kuà, mờ pal tam dră bal bơta ờ niam; kơryan, tơrmù, kràñ cê kơ̆ dơn tam dră, lơh glài kràñ bơta gơplơ̆ gơhŭc bè bồ tơngoh cing trị, nùs nhơm rài kis.

Cau mblàng Lơ Mu K’Yến