VOV4.K’ho - Drim òr (23/1), tàm Hà Nội neh bơyai lơh pơrjum gùt lơgar tơn jơh broă sền gròi Đảng nam 2018, lơh jăt kơnòl broă lơh nam 2019.

Đơs tàm pơrjum, Chủ tịch Quốc hội mò Nguyễn Thị Kim Ngân đơs tòm, cau geh đảng tàm ală broă lơh lơi gơbàn tìs ndrờm pal geh lơh glài nền nòn; tiah lơi sền gròi is ờ go\, ha là go\ mơya lơh glài ờ pràn den cấp uỷ, cau lam bồ anih lơh broă, mpồl lơh broă, tiah hơ\ pal dờp kơnòl mờ geh broă lơh glài di pal, ờ “sền broă mờng chài” lơh broă ờ loh làng.

Nam 2019 là nam kuơ màng kờ` lơh jăt cồng nha Nghị quyết pơrjum dờng dơ\ 12 bơh Đảng bal mờ rơndăp broă tơnguh bơtàu lơh sa mpồl bơtiàn 5 nam bơh nam 2016 tus 2020, rơcang pơrjum dờng đảng bộ ală cấp wèt tus pơrjum dờng dơ\ 13 Đảng dê.

Mò Nguyễn Thị Kim Ngân sồr, cấp uỷ, mpồl đảng, uỷ ban kiểm tra ală cấp pal geh lơh pràn rơlao broă sền gròi, lơh ngan, lơh sùm, ba` dil mờ ală cồng nha neh lơh geh; bơyai sền gròi sùm, tơl ală bơta, loh làng, lơh tòm, lơyaì mờ nền nòn, bơta tòm là sền gròi mpồl đảng, cau geh đảng tu\ go\ tìs.

Cau mblàng Ndong Brawl