VOV4.K’ho- Phó Thủ tướng duh broă sùm Chính phủ ồng Phạm Minh Chính neh bal mờ Phó Thủ tướng, Bộ trưởng Bộ Nội vụ lơgar Campuchia ồng Xo Khênh đơng lam bal dơ̆ Pơrjum Lơh broă bal mờ Bơtàu tơnguh ală càr tiah nhàr lơgar Việt Nam mờ Campuchia dơ̆ 11 jăt broă lơh pờ tơlik tơn tàm internet. Pơrjum tơrgùm sền swì broă lơh jăt ală jơnau ring bal neh lơh geh tàm Pơrjum dơ̆ 10 bơyai lơh tàm nhai 01/2019 mơkung cribơyai bè gùng dà lơh broă bal đah ală càr tiah nhàr lơgar Việt Nam mờ Campuchia tàm tơngai tus.

Đơs tàm pơrjum, bàr nă kuang đơng lam bồ đơs sùm bulah gơtìp gơrềng bơh kòp Covid-19, bơta gĭt gơ̆p đah 2 lơgar kung gam gàr sùm bơta bơtàu tơnguh kơ̆ kơl jăp, ngai sơlơ gơ lòt mŭt ngan ngồn tàm uă broă lơh, geh cồng nha mờ geh kuơ ngan. Tàm tơngai tus, bàr gah ring bal lơh ngan tơnguh rlau tai cồng nha pơgồp bal tàm broă tam dră mờ kòp Covid-19, tă pơgồp jơh nùs tàm broă lơh gròi sền kòp bơtờp kung bè dong kờl bơtàu tơnguh wơl, bơtàu tơnguh lơh sa- mpồl bơtiàn bơh 2 lơgar dê đơs bal mờ ală càr rềp nhàr bal dê đơs is.

Cau mblàng Lơ Mu K’Yến