VOV4.K’ho- Drim do (25/11), tàm hìu lơh broă Chính phủ, Phó Thủ tướng ồng Lê Văn Thành neh đơng lam pơrjum lùp sền nền rơndap ù tiah Tiah ring dà dờng Cửu Long tơngai bơh nam 2021 tus nam 2030, broă wèt sền tus nam 2050. Rơndap ù tiah tiah ring dà dờng Cửu Long tơngai bơh nam 2021 tus nam 2030, broă wèt sền tus nam 2050 là broă lơh kơlôi sơnơng rơndap ù tiah geh gơtha kuơmàng ngan gơ wèt tus mờ bơta bơtàu tơnguh bơh tiah ring dà dờng Cửu Long dê đơs bal mờ 13 càr tàm tiah do đơs is.

Broă bơt bơtàu rơndap ù tiah tiah ring dà dờng Cửu Long kờñ đal git gùng dà bơtàu tơnguh, rơndap tap sèng ù tiah mờ tam pà bơta pràn ai ală broă lơh lơh sa- mpồl bơtiàn, sền gàr dà lơgar, sền gàr lơngap lơngai, sền gàr tiah ơm kis geh bơta làm gah, làm bă tiah mờ làm ală càr bơh bơta tơnguh bơta pràn bơh bă tiah dê, hòi jà mờ ngui geh cồng nha ală bơta pràn kờñ bơtàu tơnguh tiah ring dà dờng Cửu Long tus nam 2050 gơ gơs là tiah geh bơta chài bơtàu tơnguh niam pơndrờm mờ gùt lơgar jat jơnau sồr geh ai tơlik tàm Nghị quyết sồ 120 bơh Chính phủ dê.

Cau mblàng K’Duẩn