VOV4.K’ho- Tàm dơ̆ pơrjum pờ tơlik tơn tàm internet mho ngai 16/5 tàm hìu duh broă Chính phủ dê đah Mpồl duh broă sùm Mpồl đơng lam dà lơgar mờ càr Bắc Giang mờ Bắc Ninh, do là 2 tiah bơtờp kòp Covid-19 uă ngan rlau jơh pà gŏ jơh bal bàr càr do ndrờm sền gŏ tai gĭt nđờ jơ̆t nă cau bơtờp mờ virus Sars CoV-2. Đơs lam dơ̆ pơrjum, ồng Vũ Đức Đam- Phó Thủ tướng Chính phủ, Kuang ătbồ Mpồl đơng lam dà lơgar rơcăng sơndră kòp Covid-19 pà gĭt, tàm pơgăp 24 jiơ tus geh tơrgùm lơh gùng che điện thoại is nàng iăt kơno jơnau yal mờ cau lơh sơnơm bơh làng bol dê tàm jơnau digơlan gơbàn jal mhar.

Đơs pơndŭt dơ̆ pơrjum, ồng Vũ Đức Đam- Phó Thủ tướng đơs loh, kòp lơh bơtờp mhar tàm càr Bắc Giang là tài bơh bơta is rơmis tiah lơh sa mờ măy mok gal cau, lơh broă tàm anih ndơ̆p hăt hal, mờ jơi tam gơl să bơh virus dê lơh bơtờp mhar ngan. Ồng Đơs sùm, nàng lơh jăt jơnau kờñ dơ̆ lĕ bal, mìng cang tiah gơwèt mờ ală tiah pơhìn bơtờp uă mơya tŭ do geh tiah ătbồ ờ kràñ tiah wàng se kơryan kòp, pal lơh niam wơl broă do. Mpồl đơng lam dà lơgar rơcăng sơndră kòp Covid-19 neh jàu kơnòl ai tơl nă kuang bàng in jăt sền ală tiah nàng gròi sền broă lơh jăt.

Cau mblàng Lơ Mu K’Yến