VOV4.K’ho- Sơlơ sền sơ wì mờ atbồ nền nòn cau mut tàm lơgar he, tơrmù tus khà lơyah ngan rlau jơh jơnau pơhìn kòp Covid-19 mut tàm lơgar he. Hơ̆ là dùl tàm ală kơnòl jal mhar tàm dơ̆ pơrjum ngai 14/4 mờ Thường trực Mpồl đơng lam dà lơgar sồr bộ, gah broă lơh geh gơnoar mờ ală càr, ƀòn dờng pal lơh jat. Phó Thủ tướng, ồng Vũ Đức Đam, Kuang atbồ Mpồl đơng lam dà lơgar rơcang sơndră kòp Covid-19 neh đơng lam pơrjum.

Thường trực Mpồl đơng lam dà lơgar đơs, kòp Covid-19 gam gơlik geh kal ke ngan tàm uă lơgar tàm tiah do bè Campuchia, Thái Lan, Malaysia... gơ rềng tơn tus broă lơh rơcang sơndră kòp bơh lơgar he dê. Tŭ do, pal hòi jà bơta pràn sơndră uă ngan rlau jơh tài tus do là dơ̆ ơm rlô ngai 30/4, ngai 01/5, jơnau kờñ lòt rê bơh làng bol dê gơguh uă.

Jat Thượng tướng Nguyễn Văn Sơn, Thứ trưởng Bộ Kuang àng đơs, pal sền gròi nền nòn ală cau mut tàm lơgar he, pơgồp bal mờ kơnòl broă bơh Ủy ban Nhân dân ală càr, ƀòn dờng dê, ngan là gơ wèt mờ ală cau geh ală mpồl lơh sa kă bro hơ pơrgon kong kơnòl khi in. Ồng Vũ Đức Đam đơs nền, pơn jat tai kràñ cê lơh glài kràñ ală cau mut tàm lơgar he tìs mờ adat boh lam.

Cau mblàng K’Duẩn