VOV4.K’ho - Drim òr (13/12), tàm Hà Nội, tàm Pơrjum Ngoại giao dơ̆ 31, neh bơyai lơh Pơrjum Ngoại vụ gùt lơgar dơ̆ 20 mờ broă pơrjum tơn bal mờ pờ tơlik tàm internet, pơgồp bal mờ ală anih pờ tàm lơgar bal mờ lơgar bơdìh.

Pơrjum Ngoại vụ dơ̆ 20 là dơ̆ kuơ màng nàng ală càr, ƀòn dờng, ală bộ, gah lơh broă Dà lơgar, ală anih lơh broă ala măt lơgar Việt Nam hờ lơgar bơdìh mờ ală gah lơh broă bal dunia geh đơs bal bè ală cồng nha neh lơh geh tàm broă lơh bal mờ lơgar bơdìh ală càr, ƀòn dờng dê, ai tơlik ală broă lơh nàng tơnguh broă pơgồp bal, tơnguh cồng nha lơh jăt broă do tàm tơngai tus.

Tàm pơrjum, Bộ trưởng Ngoại giao ồng Bùi Thanh Sơn đơs: Bơh pơrjum Ngoại vụ gùt lơgar dơ̆ 19 tus tŭ do, bơta tàm dunia mờ tàm tiah do neh tam gơl kal ke, uă ngan. Tàm hơ̆, kòp Kovid-19 jŏ mờr 2 nam do neh mờ gam gơrềng uă ngan tus mờ ală bơta tàm rài kis chính trị, lơh sa, mpồl bơtiàn bơh dà lơgar bal mờ broă tìp bal dunia. Tềng đăp mờ broă đơng lam bơh Đảng, broă đơng lam nền nòn, geh cồng nha bơh Chính phủ, broă tus bal bơh ală mpồl lơh broă chính trị, ală càr, ƀòn dờng neh lơh ngan sơrlèt mờ kal ke, tơlòng tàm broă rơcang sơndră mờ kòp gơtờp, geh sùm broă tơnguh bơtàu lơh sa mpồl bơtiàn mờ tơrgùm bal mờ dunia.

Cau mblàng Ndong Brawl