VOV4.K’ho - Tàm Hà Nội, ngai òr (08/12), Mpồl đơng lam Cảnh sát dà lềng Việt Nam đơng lam Pơrjum pờ tơlik tàm internet ală cau lam bồ Cảnh sát dà lềng ală lơgar châu Á dơ̆ 17 mờ broă tus bal bơh ală cau lam bồ mpồl cảnh sát dà lềng lơh jăt adăt boh lam tàm dà lềng gơwèt 20 lơgar, 1 kơnhoàl ù tiah, 1 mpồl lơh broă dunia mờ 3 nă cau sền gròi.

Do là pơrjum dơ̆ sơnrờp geh bơyai lơh mờ broă pờ tơlik tàm internet. Do là broă lơh jăt adăt boh lam tàm châu Á, tài tơngu me mờ bơta kuơ bal ai broă gàr niam bơta lơngăp lơngai, ờ do ờ dă, ring lơngai, ring niam mờ tơnguh bơtàu tiah tàm dà lềng tàm tiah do mờ tàm dunia. Pơrjum geh bơyai lơh mờ 2 dơ̆ pơrjum tàm nùs nhơm git gơ̆p, lơh bơyô bal, pin dờn dờn bal mờ song dơ pă. Do là dơ̆ niam nàng mpồl cảnh sát dà lềng ală lơgar jòi nàng git, ai gŏ mờ chồl pràn ală gah broă lơh bal mùl màl rơlao tai nàng bơsong ală broă lơh jăt adăt boh lam tàm dà lềng. Broă tus bal bơsong ală bơta pơhìn tus mờ bơta lơngăp lơngai ờ ờs mờng, ală bơta tơlòng pa geh tàm dà lềng pal geh tơnguh broă lơh bal đah ală lơgar bè gàr niam bơta lơngăp lơngai, ờ do ờ dă tàm dà lềng.

Cau mblàng Ndong Brawl