VOV4.K’ho - Mho òr (24/11), ồng Lê Hoài Trung, Ủy viên Đảng dà lơgar, Kuang atbồ mpồl lơh broă mờ lơgar ndai Đảng Cộng sản lơgar Việt Nam mờ ồng Tống Đào, Ủy viên Đảng dà lơgar, Kuang atbồ Mpồl lơh broă bal mờ lơgar ndai Đảng Cộng sản lơgar Lo geh đơng lam bal pơrjum pờ tơlik tàm internet yal bè cồng nha pơrjum Dà lơgar 4 khoă 13 Đảng lơgar he dê mờ Pơrjum Dà lơgar 6 khoă 19 Đảng Cộng sảm lơgar Lo.

Tàm pơrjum, ồng Lê Hoài Trung đơs, Đảng mờ Dà lơgar Việt Nam sùm sền gròi mờ pin dờn là, Đảng mờ làng bol lơgar Lo geh pơn jăt tai dờp bơhiàn rài lài do jăk chài, pơn jăt tai lơh geh ală cồng nha dờng màng pa tàm broă bơ̆t bơtàu chủ nghĩa xã hội krơi is lơgar Lo dê. Di tàm dơ̆ do, bàr gah geh đơs niam ală broă gơguh niam tàm broă lơh git gơ̆t đah bàr Đảng, bàr dà lơgar tàm tơngai do; cri bơyai bè ală broă lơh bal tàm tơngai tus, tàm hơ̆ geh broă pơn jăt tai lơh gùng nhàr dà lơgar tàm ù gơl ring lơngai, git gơ̆p, lơh bơyô bal, tơnguh bơtàu; chồl pràn broă lơh bal, sền gròi niam ală jơnau ờ ring bal tàm dà lềng, pơgồp bal tàm broă ai broă lơh git gơ̆p, lơh bơyô bal, lơh broă bal đah bàr Đảng, bàr dà lơgar bal mờ làng bol bàr lơgar pơn jăt tai geh ală cồng nha dờng rơlao tai tàm tơngai pa.

Cau mblàng Ndong Brawl