VOV4.K’ho- Drim ngai 04/6, tàm Hà Nội, Phó Thủ tướng Chính phủ ồng Lê Văn Thành, Kuang atbồ Mpồl đơng lam dà lơgar bè rơcang sơndră trồ tiah lơh aniai neh đơng lam pơrjum pờ tơlik tơn tàm internet gùt lơgar bè broă lơh rơcang sơndră trồ tiah lơh aniai mờ jòi dong kờl rềs àr tàm anih pờ tơlik tơn tàm Hìu lơh broă Chính phủ.

Pơrjum tơrgùm sền sơ wì tơl làm broă lơh rơcang sơndră trồ tiah lơh aniai nam 2020, bơh ală cồng nha neh lơh geh, ală broă gam ờ niam, jơnau mờng chài ai geh bơh ngan ngồn broă lơh đơng lam, pơlam, pơrjum neh ai tơlik kơnòl broă tờm gơ wèt tus mờ broă lơh rơcang sơndră tus tam dră mờ bơsong jơnau gơ lời wơl nàng kờñ tơrmù ƀà hoàc huơr bè kòn bơnus mờ phan bơna jat nùs nhơm bơt bơtàu mpồl bơtiàn ờdo ờdă tềng đap trồ tiah lơh aniai. Nam 2020, trồ tiah lơh aniai tàm lơgar he gơlik geh rơndap rơndồl mờ kơn jơ̆ ngan. Gùt lơgar neh geh 16 tàm khà 22 bơta trồ tiah lơh aniai. Trồ tiah lơh aniai neh lơh 357 nă cau chơt mờ roh thit mờ kờp jơh hoàc huơr bè priă jền mờr 40 rbô tơmàn đông.

Cau mblàng K’Duẩn