VOV4.K’ho- Drim ngai 22/11, Thủ tướng Phạm Minh Chính neh lam bồ mpồl kuang bàng lơgar Việt Nam, bal mờ Mpồl kuang đơng lam bồ mpồl ASEAN mờ Chủ tịch lơgar Lo ồng Tập Cận Bình tus bal pơrjum pờ tơn tàm internet kuang bàng kấp dờng màng tơngkah kir sơnrai 30 nam ngai crơng gơs git gơp cribơyai bal mpồl ASEAN mờ lơgar Lo.

Đơs tàm pơrjum, wèt tus tơnơ̆ do, Thủ tướng Phạm Minh Chính đơs nền, ASEAN mờ Lo pal pơn jat tai gàr kơ̆ bơta pin dờn jŏ jòng mờ tơnguh lơh broă bal tơl làm, tơnguh uă ală cồng nha, wèt tus ală jơnau kờñ dờng rlau, ală bơta kuơ dờng rlau ai git gơp đah ASEAN mờ Lo in. Thủ tướng đơs nền, bơh bơnàng jă git gơp lơgar rềp bal lơh bơyô, lơh broă bal ờs mờng niam bơnĕ mờ Lo, Việt Nam geh pơn jat tai lơh ngan pơgồp bơnah tơnguh git gơp đah ASEAN mờ Lo bơtàu tơnguh di khà bơh bơta lơh broă bal jŏ jòng tơl làm, tă pơgồp kuơmàng, gàr kơ̆, sơlơ tơnguh ring lơngai, lơngap lơngai, kơ̆ kơljap, lơh broă bal, bơtàu tơnguh kơ̆ kơljap tàm tiah do mờ tàm dunia, cèng wơl bơta kuơ ngan ngồn ai tơl lơgar in mờ ai bơta hờm ram, gơboh gơbài bơh tơl nă làng bol in, ờ lời cau lơi gơtìp lời wơl hờ ngkời.

Cau mblàng K’Duẩn