VOV4.K’ho- Drim ngai 17/5, tàm hìu lơh broă Quốc hội, tềng đap bơta đơng lam bơh Phó Chủ tịch Thường trực Quốc hội, Phó Chủ tịch Thường trực Mpồl duh broă tĕ khà dà lơgar, Kuang atbồ Tiểu ban kuang bàng ồng Trần Thanh Mẫn, Tiểu ban Kuang bàng bơh Mpồl duh broă tĕ khà dà lơgar dê neh bơyai lơh pơrjum nàng iat mờ ai jơnau đơs bè cồng nha lơh broă bơh Tiểu ban Kuang bàng, Mpồl duh broă tĕ khà dà lơgar dê bơh ngai crơng gơs tus tŭ do.

Đơs tàm dơ̆ pơrjum, Phó Chủ tịch Thường trực Quốc hội, Phó Chủ tịch Thường trực Mpồl duh broă tĕ khà dà lơgar, Kuang atbồ Tiểu ban kuang bàng ồng Trần Thanh Mẫn pà git, ală broă rơcang tus ngai tĕ khà neh mờ gam geh bơyai lơh di jat jơnau sồr, broă rơndap lơh ai tơlik.

Ngai do 18/5, Mpồl duh broă tĕ khà dà lơgar geh bơyai lơh pơrjum pờ tơlik tơn tàm internet gùt lơgar, dơ̆ pơrjum nàng ring bal tơngume jơnau yal bơh Tiểu ban Kuang bàng dê nàng yal Mpồl duh broă tĕ khà dà lơgar in. Phó Chủ tịch Thường trực Quốc hội, Phó Chủ tịch Thường trực Mpồl duh broă tĕ khà dà lơgar, Kuang atbồ Tiểu ban kuang bàng ồng Trần Thanh Mẫn đơs nền, do là pơrjum dơ̆ 2 bơh Tiểu ban Kuang bàng dê, dơ̆ pơrjum geh bơyai lơh tă pơgồp jơnau đơs, cribơyai tàm ală broă kuơmàng tàm tơngai tus.

Cau mblàng K’Duẩn