VOV4.K’ho- Drim ngai 20/9, tàm hìu lơh broă Chính phủ, Phó Thủ tướng ồng Lê Văn Thành đơng lam pơrjum pờ tơn tàm interrnet “Tă bơsong kal ke, kòl yan ai ală mpồl lơh sa kă bro lơh broă tàm ală anih lơh sa mờ măi mok, anih lơh sa, khu chế xuất, khu công nghệ cao mờ cụm lơh sa mờ măi mok in”.

Đơs pơn dut pơrjum, Phó Thủ tướng ồng Lê Văn Thành sồr ală mpồl lơh sa kă bro rơcang lài bơt bơtàu rơndap broă bơtàu tơnguh wơl lơh sa, gàr ờdo ờdă ai cau lơh broă in tàm rơcang sơndră kòp bơh broă lơh gơlik phan tus pơndiang, tac bro phan; pơgồp bal mờ ală tiah nàng ring bal broă rơndap lơh cit sơnơm vaccine ai công nhân in, lam lơh xét nghiệm jat tơngai pơrgon jat jơnau sồr, gàr ờ geh F0 tàm anih lơh sa, kong kơnòl tềng đap ƀòn lơgar, ờ lời gơlik geh tiah geh kòp tàm anih lơh sa. Mờkung sồr Bộ Y tế pal geh broă rơndap lơh ngan ngồn tam pà sơnơm vaccine ai ală càr, ƀòn dờng geh ală khu, cụm lơh sa mờ măi mok in, pơlam ală broă lơh rơcang sơndră kòp, gàr ờdo ờdă ai cau lơh broă in.

Cau mblàng K’Duẩn