VOV4.K’ho- Ngai 22/4, tàm ƀòn dờng Dà Làc, Ủy ban Nhân dân càr Lâm Đồng mờ Tổng Lãnh sự quán Ấn Độ tàm ƀòn dờng Hồ Chí Minh neh bơyai lơh pơrjum “Bơta pràn, tŭ tơngai niam bơcri priă tàm càr Lâm Đồng mờ lơh broă bal mờ Ấn Độ tàm gah lơh sa suơn sre”.

                                                      Pơrjum tàm tơrbŏ bal lơh broă bal kă bro đah Lâm Đồng mờ Ấn Độ 

Tàm dơ̆ pơrjum, ala mat Kuang đơng lam bồ càr, ồng  Phan Văn Đa, Phó chủ tịch Ủy ban Nhân dân càr Lâm Đồng đơs nền, tŭ do ală mpồl lơh sa kă bro, hìu bơnhă cau lơh broă sa tàm càr gam lơh sa, kă bro uă phan bơna lơh sa suơn sre geh bơta niam uă, tàm hơ̆ geh uă phan bơna neh geh Cục Sền gàr gơnoar geh ngui bồ tơngoh jak Việt Nam ai sră dờp atbồ mat kă bro bè ală phan bè biăp, bơkào, cè, kơphê mờ uă phan bơna ndai. Do là bơta buơn ngan nàng ală anih lơh broă bơh càr Lâm Đồng, mpồl bơtiàn ală mpồl lơh sa kă bro tàm càr  dê lơh pràn broă yal tơngĭt, pờ ơnàng tìp mat lơh kuèng, lơh broă bal lơh sa mờ tàm pơgơl bal phan bơna mờ ală lơgar tàm dunia, tàm hơ̆ geh lơgar Ấn Độ, dùl drà kă bro mờ tŭ do Lâm Đồng gam sền gròi ngan nàng tăc mờ blơi phan bơh lơgar do dê.

Cau mblàng K’ Hạnh