VOV4.K’ho - Broă lơh jăt, lơh jăt cồng nha broă tơm priă sền gàr tiah kis brê là broă lơh tờm gơwèt mờ gah lơh broă brê bơnơm, ai geh cơ chế priă jền pa, kơl jăp, tơmù kal ke ai kes priă pơgồp bal kuơ màng tàm broă sền gàr mờ tơnguh bơtàu kơl jăp phan geh is brê càr Kon Tum dê. Do là jơnau đơs bơh UBND càr Kon Tum tàm Pơrjum tơn jơh 10 nam lơh broă dong kờl tơm priă sền gàr tiah kis brê, tam brê ala tàm càr pơgồp bal tơnkah 10 nam crơng gơs Kes priă sền gàr mờ tơnguh bơtàu brê càr Kon Tum.

Jơnau đơs tàm Pơrjum, ồng Nguyễn Hữu Tháp, Phó Chủ tịch UBND càr Kon Tum, Chủ tịch Hội đồng atbồ Kes priă sền gàr mờ tơnguh bơtàu brê càr đơs tờm, bơh 10 nam lơh jăt, bơh nam 2011 tus 2020, broă tơm priă sền gàr tiah kis brê neh gơs dùl broă lơh dờng di pal mờ bơta mùl màl geh ală cấp geh gơnoar, ală anih lơh broă, mpồl lơh broă, cau dùl nă să ring bal kờñ lơh jăt, làng bol dờp bal mờ tus bal den tàng broă lơh mhar mŭt tàm rài kis mờ geh ală cồng nha niam bơnĕ ngan ai broă sền gàr tiah kis brê là dùl broă lơh geh pơnrơ niam gah Nông nghiệp mờ Phát triển Nông thôn dê. Ồng Nguyễn Hữu Tháp đơs: “UBND càr bơyai lơh tơn jơh 10 nam broă dong kờl tơm priă sền gàr tiah kis brê nàng sền wơl broă lơh jăt broă do. Ală cồng nha neh lơh geh, broă lơh ờ hềt pràn, tài bơta lơi, bơh tŭ hơ̆ geh ală jơnau dan, jơnau pơgồp bal gùng dà tơnguh bơtàu tơngai 10 nam tus bơh nam 2021 tus 2030. Tàm pơrjum do hòi jà ală kuang bàng đơng lam, ală sở, gah lơh broă, kuang đơng lam ală UBND ală kơnhoàl, ƀòn dờng, ală mpồl cau tờm brê, ală mpồl ngui broă lơh sền gàr tiah kis brê tơrgùm kơlôi sơnơng mờ cri bơyai ală broă lơh nàng lơh jăt broă tơm priă sền gàr tiah kis brê mờ tam brê ala ngai sơlơ niam rơlao, tơmù tus mờ khà ờ uă ngan bơta ờ niam, bơta tìs”.

Bơh 10 nam lơh jăt mờ broă tơm priă sền gàr tiah kis brê, kes priă sền gàr mờ tơnguh bơtàu brê càr Kon Tum dờp geh khà priă rơlao 1 rơbô 900 tơmàn đong, Kes priă neh tă mờr 1 rơbô 800 tơmàn đong nàng tơm ală cau tờm brê là mpồl lơh broă, hìu nhă làng bol, cau dùl nă să, mpồl bơtiàn ƀòn lơgar geh Dà lơgar jào ù, jào brê mờ UBND xã geh Dà lơgar jào kơnòl atbồ sền gàr brê. Khà priă tơm priă sền gàr tiah kis brê pơgồp bal tàm broă sền gàr 384 rơbô lồ brê ai broă lơh drơng ala, geh di pơgăp 67% khà bă brê bơh càr ờ kờp bă brê cao su, mờ ờ uă phan tam ndai. Bè broă tam brê ala, 7 nam do, càr Kon Tum tam geh rơlao 2 rơbô 200 lồ brê mờ dong kờl ai làng bol tam geh rơlao 647 lồ brê lơh sa. Ồng Hồ Thanh Hoàng, Kuang atbồ Kes priă Sền gàr mờ Tơnguh bơtàu brê càr Kon Tum đơs, broă dong kờl tơm priă sền gàr tiah kis brê gam ngai sơlơ tus tàm rài kis mờ geh gơnoar kuơ màng gơwèt mờ gah lơh sa brê bơnơm càr Kon Tum dê: “Bơh khà priă sền gàr tiah kis brê neh bơsong ală kal ke bè priă jền ai gah lơh sa mờ brê bơnơm in, nàng bơcri priă ai broă atbồ, sền gàr mờ tơnguh bơtàu brê đơs bal tàm ù tiah càr, tàm hơ̆ uă ngan là ală Công ty lâm nghiệp geh priă nàng geh sùm broă lơh tàm bơta ơm ờ lơh brê hòn is, broă lơh sa kă bro, kă bro gơtìp uă kal ke. Geh sùm bơta ring niam mờ ngai sơlơ pờ ơnàng ală broă lơh geh priă bơh tàm broă sền gàr tiah kis brê nàng bơcri tàm broă ai broă atbồ, sền gàr brê mờ tơnguh bơtàu brê, pơgồp bal tàm broă  ring niam bă brê tŭ do, mờ geh bal bè bơta uă, bơta niam mờ tơnguh bơtàu brê pa. Rài kis bơh ală kuang bàng, cau lơh broă bal mờ làng bol tus bal sền gàr brê geh tơnguh loh làng, iang nùs lơh broă mờ đềt mềr mờ brê”.

Bal mờ cồng nha neh lơh geh, tàm pơrjum tơn jơh 10 nam lơh jăt broă tơm priă sền gàr tiah kis brê, tam brê ala tàm càr Kon Tum pơgồp bal mờ broă tơnkah 10 nam crơng gơs Kes priă sền gàr mờ Tơnguh bơtàu brê càr Kon Tum, ală kuang bàng kung neh song dơ pă ai gŏ ờ uă bơta gam ờ pràn pal geh tơmù nàng tơnguh niam rơlao tai cồng nha bơh broă tơm priă do, mùl màl bè: Gam geh bơta ờ hềt yal loh, lơyài tàm broă tă priă bơh ờ uă mpồl lơh broă ngui broă drơng ala tiah kis brê: Geh ờ uă cau tờm brê ờ hềt ai gŏ mờ tơm priă sền gàr tiah kis brê ai hìu nhă, cau dùl nă să, mpồl bơtiàn ƀòn lơgar dờp atbồ sền gàr brê di tŭ... Đơs tàm dơ̆ tơn jơh pơrjum, ồng Nguyễn Hữu Tháp, Phó Chủ tịch UBND càr Kon Tum, Chủ tịch Mpồl duh broă atbồ Kes priă Sền gàr mờ Tơnguh bơtàu brê càr ai tơlik ờ uă broă lơh nàng tơmù ală broă gam kal ke tàm broă lơh jăt broă tơm priă sền gàr tiah kis brê, tàm hơ̆ đơs uă tus mờ gơnoar bơh gah lơh sa suơn sre bal mờ Kes priă sền gàr mờ Tơnguh bơtàu brê càr Kon Tum dê: “Sở Nông nghiệp mờ Phát triển Nông thôn pơgồp bal mờ Kes priă sền gàr mờ Tơnguh bơtàu brê, ală mpồl lơh broă gơrềng bal pơn jăt tai bơto sồr ală mpồl cau tờm brê lơh jăt broă lơh di mờ kơrnoăt neh geh ai. Lơh niam broă sền gròi broă atbồ, ngui priă drơng al tiah kis brê bơh ală cau tờm brê là mpồl lơh broă. Lơh jăt broă sền gròi broă tam brê ala tàm càr. Đah sền gàr brê pơgồp bal mờ ală mpồl lơh broă gơrềng bal geh broă lơh nàng bơsong ală mpồl lơh broă, ală cau, ală mpồl lơh broă ờ lơh jăt broă kĭ hơ bal ală broă lơh broă bal tàm broă tơm priă sền gàr tiah kis brê, yal loh làng broă tă priă tơm priă sền gàr tiah kis brê di jăt mờ kơrnoăt neh geh ai mờ ală cau tờm brê là ală mpồl lơh broă dà lơgar tơm priă ờ tơl, di tơngai priă drơng ala tiah kis brê ai cau dờp sền gàr brê in”.

Mờ broă lơh geh cồng nha broă tơm priă sền gàr tiah kis brê, di tơnkah 10 nam crơng gơs, Kes priă Sền gàr mờ Tơnguh bơtàu brê càr Kon Tum pơnyờ să ngan dờp Bồ bi pơrlòng bơh Thủ tướng Chính phủ pà mpòl cau jăk chài, tơl ală bơta tàm kơnòl broă lam lài broă pơrlòng kờ` gơboh mờ dà lơgar càr Kon Tum nam 2020. Di tàm dơ̆ do, Chủ tịch UBND càr Kon Tum kung pà sră jờng rê ai 3 mpồl, 5 nă cau, 12 ƀòn, 6 hìu làng bol geh cồng nha jăk chài tàm broă lơh jăt broă tơm priă sền gàr tiah kis brê mờ tam brê ala tàm càr tàm 10 nam do.

Cau cih Khoa Điềm-Cau mblàng Ndong Brawl