VOV4.K’ho- Tàm Hà Nội, Văn phòng Quốc hội bơyai lơh Pơrjum tơn jơh tơngai lơh broă bơh Mpồl kuang bàng Quốc hội kơnòm să khóa 14 (tơngai bơh nam 2016 tus nam 2021). Phó Chủ tịch Quốc hội, ồng Đỗ Bá Tỵ neh tus bal pơrjum.

Ală jơnau đơs đơs nền: Kuang bàng Quốc hội kơnòm să neh tă pơgồp uă ngan, ngan ngồn tàm cồng nha broă lơh crơng gơs adat boh lam, sền gròi mờ lơh nền ală broă kuơmàng bơh Quốc hội khóa 14 dê, đơs nền bơngă, gơnoar broă bơh rơnàng kơnòm să Việt Nam dê tàm anih lơh broă geh gơnoar dờng ngan rlau jơh, dipal mờ bơta pin dờn bơh Đảng, Quốc hội, làng bol mờ cau tĕ khà gùt lơgar. Bulah bè hơ̆, ală kuang bàng kung đơs là, kuang bàng là cau kơnòm să den tàng ờ huan geh mờng chài, pal lơh ngan bơsram rlau tai. Đơs tàm pơrjum, Phò Chủ tịch Quốc hội, ồng Đỗ Bá Tỵ pà git, geh yal mờ Ủy ban Thường vụ Quốc hội nàng pơn jat tai geh cơ chế dong kờl geh cồng nha rlau ai broă lơh bơh mpồl kuang bàng Quốc hội kơnòm să dê in.

Cau mblàng K’Duẩn